Partii Inuit, Atassutip Siumullu politikkii assigiinngeqaat

Inatsisartunut qineqqusaarnerup aallartinneraniilli Partii Inuit oqaatiguarpaat, kalaallit oqaasii ataqqineqarlutik oqartussaqarfinni tamani atorneqartariaqartut aamma Inatsisartut ataatsimiittarfianni oqaluttarfimmit kalaalisuinnaar oqaluttoqartarnissaa oqaatigisarlugu.

Atassusit partiitut aallartinnerminni politikkiisa toqqammavigilluinnarpaat, Danmarkimut attaveqarnerup innarlerneqannginnissaa, taamaattumillu Inatsisartunut qineqqusaarnerup nalaanni, Atassummit qinigassanngortittup, Steen Lynge-p Partii Inuit kalaallisuinnaq oqalunnissamik politikkeqarnera isornartorsiortarlugu.

Atassutip aamma Partii Inuit politikkikkut oqariartuutaasa assigiinngissusaat eqqarsaatigalugit, Atassutip sumi inissisimanera ersarnnerluppoq.

Oqaatsit kisiisa eqqarsaatiginagit aamma aatsitassarsiornermi uranip ilanngullugu piiarneqarluni tunisassiarineqarnissaanut partiit taakku marluusut politikkiat assigiinngillat. Partii Inuit uranimut naaggaarluinnarnertik nittartagaanni atuarneqarsinnaavoq aamma oqariartuutigalugu aatsitassat qallorneqaratik nunap iluaniiginnartariaqaraluartut oqaatigalugu.

Partii Inuit politikkertik taamma allallumi maanna allangortittariaqalersinnaavaat, Siumup piumasaqaataat malinneqassappata. Atagu Aleqa Hammond ippassaq naalakkersuisunngortitsinissamik nalunaaruteqarnera tusarfigilaariartigu.

- Royaltiesit eqqunneqarnissaanni apeqqut pingaartipparput. Tassalu tamanna oqaloqatigiinnitsinni qitiusut ilaat. Aalisarnerup iluarsartuuteqinnissaannut apeqqutit aamma qitiusunut ilaapput, taamatullu Nunatsinni uranimut naagaarluinnaarnermiit aammaassinissamut apeqqut naalakkersuisunngortitsiniarnitsinni pingaartutut qaqissimallutigu.

Siumup siulittaasua, Aleqa Hammond tusagssiortunik katersortitsinermi ilaatigut taama aallarniuteqarpoq.

Partii Inuit qinersisartuminnut neriorsuutitit eqquutsikkunnaarneerneraat paasiniarlugit apererusussimagaluarpagut, tamannali oqaaseqarfiginiarnagu aalajanghersimapput. Aamma Atassut Siumullu apeqqutinut taakkununnga akinissaminnut periarfissinneqaraluarput taamaaliorumanatilli.

Partiit pingasuullutik maanna naapisimaaqattarput naalakkersuisunngortitsiniarnermi inissitassat kingulliit aaqqinniarlugit.