Parnaarussivinni sulisut kattuffiat akissarsiat nikingassutaannik aaqqeeqqusisoq
Inissiisarfinni paarsisut akissarsiakippallaarujussuarput, Parnaarussivinni sulisut kattuffiat taama isumaqarpoq, Danmarkimilu parnaarussivinni paarsisut akissarsiaannut naaopertuuttumik nalimmassaasoqarnissaa piumasaralugu.
Nunatsinni inissiisarfinni paarsisut Danmarkimilu parnaarussivinni paarsisut akissarsiaasa naligiissinneqarnissaat Parnaarussivinni sulisut kattuffiata piumasaraa.
Nunatsinni pineqaatissinneqarsimasunut inissiisarfimmi overbetjentip tunngaviusumik akissarsiai ullumikkut 19.469 koruuniupput, akileraarutit suli ilanngaatiginagit. Københavnimi parnaarussivimmi paarsisup akissarsiaanit 5.000 koruuningajannik ikinnerupput, Parnaarussivinni sulisut kattuffiat taama ilisimatitsivoq.
AAMMA ATUARUK Pinerluttunik isumaginnittoqarfimmut aningaasassat isumaqatigiinniutigineqassasut
Tamannalu akuersaarneqarsinnaanngilluinnarpoq, Parnaarussivinni sulisut kattuffianni allattaasoq, René Larsen, tusagassiorfinnut nalunaarummi taama oqarpoq.
- Suliffinnut assigiinnut naligiimmik akissarsiaqartitsisoqarnissaa tunngavigineqartariaqarpoq. Maanna taamaattoqanngilaq, tamannalu suleqatitta assersuusiaasigut ersarilluinnarpoq.
Nunatsinni inissiisarfinni paarsisut 12 procentii piffissami 2015-imit 2017-imut suliunnaarsimapput, inissiisarfinnilu paarsisunik Nuummi maannakkorpiaq amigaateqartoqarpoq.
AAMMA ATUARUK Sara Olsvig inatsiseqarnermut ministerimut kissaaterpassuaqartoq
Danmarkimullu naleqqiullugu akissarsiakinnerusoqarnera pissutigalugu inissiisarfinni paarsisunik nutaanik siunissami sulilersitsinissamut pigiinnarnissaannullu ajornarnerulersitsisinnaanera René Larsenip aarleqqutigaa.
Danskillu inatsisinik atuutitsinermut ministereqarfiata suliami iliuuseqarnissaa - aammaarluni - piumasaraa.
- Parnaarussivinni sulisut kattuffiata ajornartorsiutaasoq ukiorpassuarni erseqqissaatigisarpaa, susoqarsimanngilarli, René Larsen oqarpoq.
Inatsisinik atuutitsinermut ministereqarfiup siornatigut erseqqissaatigisimavaa inissiisarfinni paarsisut akissarsiaat akissaatit pillugit isumaqatigiinniarnikkut aalajangersarneqartartut, Nunatsinnili politiit inissiisarfinnilu paarsisut akissarsiatigut atugaat ministereqarfiup misissuiffiginiarai
