Parisimi ataatsimeersuartut isumaqatigiingajalerput
Nunarsuaq tamakkerlugu isumaqatigiinniartitat silap pissusia pillugu Parisimi ataatsimeersuarnermi sisamanngornikkut unnukkut isumaqatigiinngajalersut, ataatsimeersuarnerup aqutsisua, Frankrigip nunanut allanut tunngasunut ministeria, Laurent Fabius taama nalunaarpoq.
- Isumaqatigiikkusuppugut, anguliivipparput, Fabius oqarpoq, ilanngullugulu oqaatigalugu maanna piffissanngortoq isumaqatigiinniarnermi naapeqatigiiffissat kingulliit suliarissallugit.
Nunatta nalunaaqutaa malillugu arfininnguliivissoq isumaqatigiissutissamut siunnersuummik nutaamik saqqummiussivoq, ataatsimiinnerullu aallarteqqinnginnerani isumaqatigiinniat akunnerit marluk atorlugit misissortussanngorpaat.
Isumaqatigiinniartut "nunarsuaq tamakkerlugu inatsisitigut pituttugaasumik, angusaqarluarniartumik, naleqquttumik atajuartussamillu, nunarsuarmiut utaqqisaannut, isumaqatigiinnissaminnut" piareersimassasut Laurent Fabiusip naatsorsuutigaa.
- Iluatsissaaq, iluatsissinnaavorlu. Asasakka ikinngutit, isumaqarpunga iluatsileripput, Frankrigimi ataatsimiinnerni nunarsuarmit tamaneersunit isumaqatigiinniarfiusumi aqutsisoq oqarpoq.
Isumaqatigiissutilli tallimanngorpat unnukkut kingusissukkut arfininngornerulluunniit unnuaani aatsaat inissivinnissaa ilimagineqarpoq.