Panbop Namminersorlutik Oqartussanut kommunimullu isumaqatigiissut taamaallaat malippaa, taama suliffeqarfiup piginnittua, Elizabeth Pedersen-Panbo oqarpoq.
- Namminersorlutik Oqartussanut isumaqatigiissuterput maliinnarparput, tassalu atortuutigut Aalborgimi umiarsuarmut tunniutissagigut.
Akerlianilli isumaqarpoq, Kim Fritze ingasattajaartoq, Panbo-p nassiussinerminut qaammatit arfinillit arfineq marlullu ingerlaneranni amigaataasunik nassiussinerminnut atorsimagaat oqarmat.
- Danmarkimiit Ilulissanut amusartunut atortussat nassiunnerinnaat qaammatinik taamak sivisutigisumik sivisussuseqarsimasinnaanissaa naatsorsuutiginngilara (qaammatit arfinillit arfineq marlullu ingerlaneranni nassiussisimasoqarsimasoq Fritz oqarpoq, aaqq.). Ukiumimmi sivisunerpaartaani umiarsuit ingerlaartuartarmata. Utoqqatsissutipaalaaginnaavoq, Elizabeth Pedersen-Panbo oqarpoq.
Taassuma pakatsissutigineruaa illut marluk suliarititani suli atorneqalersimanngimmata. Tassungalu Panbo assuarineqarsinnaanngitsoq isumaqarpoq. Kommunimmi inniminnigai tunniutiinnarai isumaqarpoq.
- Namminersorlutik Oqartussat akiliisuupput, kommunilli sanaartorneqa aquppaa, namminneq kissaatigisartik malillugu.
- Illut tunniussassi Kalaallit Nunaannukaatsitassi suliarineqarnerannut tunngatillugu ingerlaaseq naammagisimaarpiuk?
- Aap naammagisimaarpara. Malugaarput illut nassiuttakkagut naammagisimaarneqarluartartut, Elizabeth Pedersen-Panbo akivoq.
Ippassarli suliffiutillip Kim Fritzep illunut piareersariikkanut Panbo-nut isornartorsiuvoq.
- Illut Kalaallit Nunaannut tulluutinngillat, Spanialli kujataanut tulluunnerugunarput. Ima kukkuneqartigipput Kalaallit Nunaata avannaanut tulluuttuunatik, Kim Fritz oqarpoq.
Elizabeth Pedersen-Panbo-li isumqataanngilaq:
- Kukkulluinnarpoq. Qisuup Spaniami kiak saperpaa.
Illut Panbo-t illuni piareeriikkani Kalaallit Nunaanni sananeqarsimasuni pitsaanerpaanut ilaapput, Elizabeth Pedersen-Panbo oqarpoq.
- Illuliagut 1962-imili Kalaallit Nunaanni sanaartorneqarput. Taakkulu Kalaallit Nunaanni pitsaanerpaamik inissisimasuupput. Illut Kalaallit Nunaanni sanaagut tanngassimaarutigisorujussuuakka, Elizabeth Pedersen-Panbo naggasiivoq.