Panbo allani aamma ajornartorsiutaapput

Illut Panbomeersut tallimat Paamiuni sananeqarmata pisariusimavoq,

Sulisitsisut Peqatigiiffiata Paamiuni immikkoortortaqarfiani siulittaasoq entreprnør Finn Olesen oqarpoq.

- Illut sananeqarneranni perusuersartarfiit natii ullutsinnut naleqqutinngitsut paasivarput, piumasaqaatinullu naapertuutinngitsut, sanaartugassanik suliassinneqartartoq oqarpoq,

Piumasaqaatinut naapertuutinngitsumik Namminersorlutik Oqartussat akuersisarnerarlugit.

Illut Panbot amerlasuut sumi sanaartorneqassanersut suli aalajangerneqaratilluunniit illoqarfinnilu sorlerni sanaartorneqassanersut aalajangiivigeqqaarnagit, Namminersornerullutik Oqartussat sanaartortitsipput, Finn Olesen oqarpoq.

Illuliornermi atortussat tikisinneqaraangata atortussat ilaat atorneqarsinnaaneq ajorput, sanaartorfissamut naleqqutinnginnamik.

Suliassat ilaat pilersaarutigineqartumik mumingasumik inissisimasarmata.

- Illuliorfissaq illuliarineqartumut naleqqiullugu kukkusumik sammisinnaavoq, illuliornermi atortussat mumingasumik sammiveqartut tikisinneqartaramik, Finn Olesen oqarpoq.

Illut Panbomeersut tallimat Paamiuni sananialeramigit, Finn Olesenip tamanna misigivaa.

Illussat Panbomeersut tallimat atortussaat maanna Paamiuniiipput. Ukiuni marlunni Paamiuneereerput sulili atorneqaratik.

- Atortussat maanga tikisinneqaramik ukioq siulleq silamiiginnarput, maannali ukioq ataaseq quersuarmiitinneqarlutik. Pilersaarutit malillugit ukioq ataaseq qaangiuppat aatsaat atorneqassappata pitsaassusiat apeqquserneqarsinnaavoq, Finn Olesen oqarpoq.

Illut Panbomeersut nalingannut assingusumik aningaasanik taamanikkut Namminersornerullutik Oqartussat kommuninut tunniussimasuugunik illut pitsaanerusut ussinnerusullu kommunip pissarsiarisimassagaluarpai, Finn Olesen naggasiilluni oqarpoq.