Pan Amimut aningaasaliisussarseqqittut

Tele-Post unammisaqattaarnerni ullunik qulinik sivisussuseqartuni Inussivimmi unammiffiusussami isiginnaarianut unammisartunullu akeqanngitsumik internetteqartitsiniarpoq.

- PANAM2018 timersornikkut unammersuarneruvoq nunat allat peqataaffigisassaat. Unammersuarneq taama annertutigisoq aamma TELE-POST-ip peqataaffigerusullugu nalunaarutiginikuuaa, attaveqaqatigiinnermut pisortaq, Arnakkuluk Jo Kleist, tusagassiorfinnut nalunaarummi taama oqarpoq.

Tele-Post aamma Pan Amimi unamminerit internettikkut aallakaatinneqarsinnaanngorlugit internettimik atugassaqartitsissaaq. Suliniummillu aqutsisup Poul Petersenip unammersuarnerit iluatsitsiffilluassappata taamatut suleqatigiinnissaq pingaaruteqartutut taavaa. 

- Panamerikami pissartanngorniunnerit nunani allani aamma takuneqarsinnaanissaat pilersaarutigisimavarput attaveqaatillu internettikkut aqqut atorlugu takutinneqartassapput, tassa nunani Amerika kujallermi aammalu Amerika avannarlermi. Uanilu TELE-POST-ip tapersersuinera attaveqaatissanik pisariaqartitsinerput tapersermagu assut qujamasuutigivarput, Poul Petersen oqarpoq.

Pan Am Nuummi juunip 15-ianit 25-anut ingerlanneqassaaq.