Pallep ataqatigiissaarisoqarsimannginnera nassuerutigaa
Aningaasaqarnermut ataatsimiititaliap kisitsisit assigiinngitsut marluk tigusimavai, arlaat Aningaasaqarnermut Naalakkersuisoqarfimmit, allallu Kulturimut, Ilinniartitaanermut, Ilisimatusarnermut Ilageeqarnermullu Naalakkersuisoqarfimmit.
Kisitsisillu assigiissimanngilat. Aningaasaqarnermut ataatsimiitaliap kukkusutut taasaa akissutitut tigusimavaa, kisianni tamanna Aningaasaqarnermut Naalakkersuisup utoqqatsissutigiumanngilaa.
- Tassami oqaluttuarinngikkukku allat aamma allatut isumaqartut, taava pasillerneqalissaanga paasissutissanik isertuussisutut, oqaatigineqaqqammersumut akerliusumik. Uangalu isumaga malillugu tamanna ajornerpaajuvoq, tassa paasissutissanik isertuussineq paasissutissanit akerliussutaasunit saqqummiussininngarnit, Palle Christiansen oqarpoq.
Taassuma ilanngullugu oqaatigaa paatsuunganeq pissuteqartoq piffissakilliornermik.
- Piffissakkilliornerput pissutigalugu akissutit tamaasa piinnarpavut, taavalu oqarluta, aap, taava isumasioqatigiinnissamut aggequsiinnassaagut, taavalu tassani nassuiaatigalugu suut Naalakkersuisoqarfiit akornanni aaqqiagiinngissutaanersut, Palle Christiansen oqarpoq.
Taamaattorli Aningaasaqarnermut Naalakkersuisup nassuerutigerusuppaa ataqatigiissaarineq pitsaavallaarsimanngitsoq.
- Tassuunatigut ataqatigiissaarineq pitsaavallaarsimanngilaq. Siunissami iliuusissarput tassa, takusinnaagutsigu naalakkersuisoqarfiit marluk akornanni isumaqatigiinngittoqartoq, taava tamanna aaqqiivigineqaqqaassaaq akissutip aningaasaaqarnermut ataatsimiititaliamut nassiutinnginnerani, Palle Christiansen oqarpoq.
Ilutigalugu Aningaasaqarnermut ataatsimiititaliap uparuaataa paasisinnaanerarpaa, neriorsuillunilu aappaagumiit pitsaanerulissasoq.
- Soorunami anneruniassanngilagut, kisianni uani pisariaqapoq Naalakkersuisut tamarmiusut oqarfigissallugit, tulliani eqqortumik sulisoqassasoq, taannalu uparuaaneq tusaatissatut tigussavarput, taava takussavarput aappaagu pitsaanerulernersoq, aamma taamaattariaqarpoq, Palle Christiansen naggasiivoq.
