Palle Folketingimut qineqqusaarpoq

Naalakkersuisuusimasoq Demokraatinullu ilaasortaasimasoq, Palle Christiansen, Folketingimut qinersinissamut qineqqusaarpoq Folketingimi talerperliit Liberal Alliance sinnerlugit.

Allattoq Andrea Christiansen

maajip 29-at 2015 16:20

Affarmik kalaaleq Palle Christiansen ukiut aqqaneq-marluk Nunatsinni najugaqareerluni siorna Danmarkimut nuuppoq.

Taanna partiimik Demokraatinik pilersitseqataavoq, 2002-miillu 2013-imut Inatsisartuni ilaasortaavoq.

Ukiunilu tullerni marlunni Aningaasaqarnermut Akileraartarnermullu kingornatigullu Kuupik Kleistip naalakkersuisunut siulittaasuunerata nalaani Ilinniartitaanermut, Ilisimatusarnermut Nunallu avannarlernut suleqatigiinnermut naalakkersuisuuvoq.

Aamma atuaruk Naalakkersuisut innuttaasunik peqataatitsiniarnerat Pallep apeqquteqaatigaa

Folketingimut qinigassanngortinnermini isissagui anguniagarai – suliffissat inuussutissarsiutillu Danmarkimi annertusarnissaat, pisuullu akileraaruteqarpallaarnerisa appartinneqarnissaa sulissutiginiarpaa.

Palle Christiansen Nordsjælland Storkredsimi qinigassanngortippoq, tassani nuliani meeqqanilu pingasut najugaqarput.