Palle Christiansen: Uuliasiortitseqatigiit ilinniartitaanermut aningaasaliisalertariaqarput

Uuliasiorsinnaalernissaq pillugu ilinniakkat akisoorujussuupput, uuliasiortullu ilinniakkanut atortunullu aningaasaliisarnissaat, Nunat allat qulakkeertarpaat. Assersuutigalugu College of North Atlantic, Canadamiittoq, taamaaliornermik misilittagaqarluarpoq. Taakku ilaatigut oqaatigaat uuliasiorsinnaanissamut pillugit akuersissutit uuliasiorniartut isumaqatigiinniarfigineqaraangata politikerinit tamakku qulakkeerneqartariaqartut.
Aatsitassarsiornermut Ilinniarfimmi rektorip Hans Hinrichsenip tamanna isumaqataaffigaa.

Uuliasiortitseqatigiit arfineq-marluk isumaqatigiissusiorfigineqareermata, ilinniarfinnut aningaasaleeqataasarnissaannut kingusinaariinnginnerpugut?

- Naagga, kingusinnaanngilagut. Akuersissutinik tunniussiniarnerup nalaani tamakku qulakkeerneqarsimasariaqaraluarput. Isumaqatigiissutit maanna atuuttut immikkut ittumik tapiliussamik isumaqatigiinniarfigineqarsinnaapput. Tamanna ajornartorsiutaasariaqanngilaq. Akuersissutinik tunniussiniaraangatta uuliasiortitseqatigiit ilinniartitaanermut aningaasaliisalernissaat uanga maannamiit sulissutiginiarpara, Palle Christiansen oqarpoq.

Qanoq iliornikkut tamanna anguniarneqassava?

- Naalakkersuisut ataatsimeeqatigiikkaangata aningaasaliisarnissat oqallisigineqarsinnaapput. Akuersissutinik tunniussissagutta ilinniartitaanermut ilisimatusarnermullu aningaasaliisalernissaat piumasaqaataassariaqarpoq, taannalu sulissutiginiarpara, isumaqatigiissutinut ilanngunneqartariaqarnerat piumasaqaatiginiarlugu, Palle Christiansen oqarpoq.

Ilinniartitaanermut aningaasateqarfiliortoqarsinnaanissaa, taassuma takorloorpaa.

- Nunarput mikigaluaqisoq aamma uuliasiornermi aatsitassarsiornermilu misilittagakikkaluaqaluta, iluatsittumik isumaqatigiissusiortareernikuuvugut. Aamma pitsaanerulertuaannarsinaavugut.
Kisianni aningaasartaqaqisunik isumaqatigiissusiuliussagutta, siunnersuisartunik nunani allanersunik, uulisiortitseqatigiiffinnut angisoorsuarnut isumaqatigiinniarnermik misilittagaqartunik, suleqatissarsiussaagut. Taamaaliunngikkutta ajutumiissaagut.
Tassami uuliasiorfissuit eqqartuussissuserisunik, ilisimatusarfinni pitsaanerpaani ilinniarsimasunik, sullinneqartarput, uagullu suliffeqarfimmiit siunnersuisartunit, pingasunik sisamanik sulisulimmit, ikiorneqarluta. Taamaammat illuatungilersinnaanngivippagut, Palle Christiansen oqarpoq.