Palle Christiansen tunuarpoq

Sapaatip akunnerata naanerani Demokraatit  ataatsimeersuarnerminni  politikkimut akisussaasutut siulittaasup tulliat Palle Christianseni Anda Uldumimik taarserpaat.  Palle Christiansen 2002-mili politikkimut akisussaasutut siulittaasup tulliatut inissisimavoq, Demokraatillu pilersinneqarmata peqataasimalluni. Demokraatini aaqqissuussaanermut akisussaasuusimasoq Ane Lone Bagger Michael Rosingimit aamma taarserneqarpoq.

-Ukiorpassuarni politikkikkut akisussaaqataavunga isumaqarpungalu politikkikkut anguniakkakka angusimalerlugit uannut partiimullu. Nuannaarutigaara piukkunnarluartumik inummik kingoraarneqartussanngorama. Qularinngilara Anda Uldum siulittaasup tullianut sulilluakuttoorumaartoq, taama Palle Christiansen oqarpoq.

Siulittaasup tulliatut atorfeqalernini Anda Uldumip imatut oqaasertalerpaa:

-Nalunngilara imaannaanngitsumik suliassaqarlunga qilanaarpungali aqutsisoqatikka partiimilu ilaasortat suleqatigalugit sulinissannut. Qulakkeerniarpara Demokraatit Kalaallit Nunaanni qaqumigineqartunik qalluijuarnissaa nungusaanissaalu tamakku Kalaallit Nunaata tamakkiisumik ineriartornissaanut akorngutaammata, taama politikkimut akisussaalluni siulittaasumut tullinngortoq Anda Uldum oqarpoq.

Aaqqissuussaanermut akisussaalluni siulittaasumut tulliusoq aamma taarserneqarpoq.  Ane Lone Baggeri Michael Rosingimit taarserneqarpoq.

-Piffissami aggersumi arlaleriarluta qinersisussaavugut uangalu piffissara taakkununnga atorniarpara. Taamaattumik pissusissamisoortutut isigisimavara suliama tulliuttumut tunniunissaa, taama  Ane Lone Bagger oqarpoq.

Michael Rosing Inatsisartunut sinniisussaareertoq  aaqqissuussaanermut akisussaasutut toqqagaanini imatut oqaasertalerpaa.

-Inatsisartunut kommunalbestyrelsimullu qinersisussaavugut , taamaattumik suliassaaleqinavianngilanga, taama  Michael Rosing oqarpoq.