Palle Christiansen: Jens B-p atorfinitsinneqarnera apeqquserneqarsinnaavoq

- Inatsisartuni ilaasortaanera pissutaalluni atorfinitsinneqarsimasoq, True North Gemsip tusagassiuutinut nalunaarutaani atuarneqarsinnaavoq. Taamaattoqarsimappat assersuutigalugu aatsitassarsiortitseqatigiit oqarput politikerimik pisisimallutik. Taamaassimapallu politikeritut suliaq apeqquserneqarsinnaanngussaaq, tassami partii sinnerlugu oqaaseqarnersoq, aatsitassarsiortitseqatigiilluunniit sinnerlugit oqaaseqarnersoq apeqquserneqarsinnaanngussammat, tamannalu soorunami pitsaasuunngilaq, Demokraatit sinnerlugit Inatsisartuni ilaasortaasimasoq Palle Christiansen oqarpoq.

Peqquserluttuliornermik akiuiniarnermik sulianiaqatigiiffiup Transparency Greenlandip, Jens B. Frederiksenip True North Gemsimi atorfininnera aamma apeqquserpaat, Jens B. Frederiksenip aatsitassarsiortitseqatigiinni atorfeqarnermi saniatigut politikkikkut suliani attatiinnarniarmagu:

- Oqartussani atorfilittat politikerillu assigiinngitsut aatsitassarsiornerup iluani ilaatigut atorfinittarnerat siornatigut isornartorsiornikuuarput, matumanili pisut ilungersunarnerusutut nalilerpavut, atorfininnermimi saniatigut polikkikkut suliani ingerlatiinnarniarpai, Transparency Greenlandip siulittaasua Anders Meilvang oqarpoq.

Jens B. Frederiksenilli True North Gemsimi atorfinitsinneqarneranut atatillugu apeqqusiisut tamaanga killeqanngillat. Issittumi Siunnersuisoqatigiit, ICC, isornartorsiuisunut aamma ilaapput, inuussutissarsiutitigut soqutigisat qinikkatullu suliat immikkoortinneqartarnissaat ujartorlugu:

- Qinikkatut suliassat innuttaasunut sinnerlugit suliassaat immikkoortilluinnaqqissaartariaqarput, privatimik nammineerluni inuutissarsiutini tunngassuteqartunut atatillugu, aammalu pingaartumik una aatsitassarsiorneq aningaasarpassuarnik avataaninngaanniit taamatut neqerooruteqarneq aallaavigalugu pisut sissuerluinnartariaqarput, ICC-p siulittaasua Aqqaluk Lynge oqarpoq.