Palle C-p ilinniagaqarnersiutinik annaasaqartarneq aaqqiiviginiarpaa
Taamaammat immikkut ittumik pineqarnissamit annerusumik periarfiissiisumik, nalunaarummik nutaamik suliaqartoqarnissaa sulissutiginiarpaa.
Nini Tessing, kræfteqarnerminik Københavnimi Rigshospitalimi ukiuni kingullerni marlunni katsorsarneqartoq, napparsimavallaarluni ilinniarfimmini malinnaasinnaajunnaarami, februaarip qaammataaniit maajimut ilinniagaqarnersiuteqartinneqanngilaq.
Ilinniagaqarnersiuteqartitsitsivimmiit KNR-mut sapaatit akunera kingulleq nassuiaasoqarpoq, malittarisassat imannak paasisaritik, ilinniartut ilinniarfimminut takkuttarlutik ilinniarunik aatsaat ilinniagaqarnersiutisisarsinnaasut. Taamalu paasinninneq ajoqutissaqanngitsoq, naalakkersuisuni tamatumunnga akisussaasup Palle Christiansenip, erseqqissarpaa:
- Taamannak paasineqartussaapput, nalunaarummi taamannak suliaagami. Kisianni takusinnaasarput tassaavoq, immikkuullarissunik pisoqartillugu, ilinniartunut ataasiakkaanut ikiuunnissamut periarfissagut tamakkiisuunatik. Tassalu suliaq, tusagassiutini sammineqartoq, malittarisassat malillugit suliarineqarpoq.
- Kisianni nalunaarut siunissami eqaannerusunngortussanngorlugu suliarineqartariaqarpoq, assersuutigalugu kræfteqalersimasut qanoq sivisutigisumik katsorsarneqarnissaat ilisimaneqanngikkaangat, immikkuullarissumik atugaqartut taamaalilluni aamma naaperiarneqarsinanngorlugit.
Suliat ataasiakkat aallavigalugit immikkut pinninnissamik periarfisiissumik, nalunaarummi titarnertaamik ilanngussisoqarnissaa, Palle Christiansen maanna sulissutiginiarpaa.
- Malittarisassat maanna imaapput, ilinniagaqarnersiutisiassat kinguartinneqarallarsinnaallutik. Atuarfimmulli takkuttarnissaq piumasaqaataavoq. Kisianni imaaliorsinnaavugut, Danmarkimi Nuummiluunnit katsorsarneqaraanni, aammalu ilinniarneq nammineq ingerlallugu misilitsinissamullu sapinngisaq naapertorlugu iliuuseqarluni uppernarsarsinnaallugulu, taava ilinniarnersiutisisoqarsinnaassaaq, Palle Christiansen oqarpoq erseqqissarluguli:
- Uukapaatitsiniartunut periarfissiinertaqanngitsumik immikkut pinninnissamut periarfissornissaq suli pingaarpoq. Tassami aamma uukapaatitsiniartoqartarpoq.
Malittarisassalli nutaat Nini Tessingimut, ilinniagaqarnersiuteqanngitsoornermigut 12.000 koruuninik annaasaqartumut, iluaqutaassanngillat.
- Tassami inatsisinut tamatumani atuuttunut pituttugaavugut. Ataatsiakkaatigullu allangortitsigutta, aamma allanut atuuttussanngortussaapput, Palle Christiansen oqarpoq.
Tassumalu erseqqisarpaa, ilinniartut napparsimaneq peqqutigalugu ilinniagaqarnersiuteqarunnaartut, aningaasartuutitik uppernarsarsinaagunikkit, pisortat ikiorsiissutaannik pinissamut pisinnaatitaasuit
Nini Tessing Danmarkimi ilinniagaqarnersiuteqarsimagaluarpat, pissutsit allaanerunissaat ilimanarluinnarpoq. Ilinniagaqarnerisuteqarneq pillugu naalagaaffiup allaffianiit ilisimatitsipput, napparsimalluni ilinniarfiliartarsinnannginneq immikut pineqarluni ilinniagaqarnersiuteqarnissamut naammattoq.
Danmarkimi ilinniarfimmiit sivisuumik peqannginnissamut napparsimaneq tungavilersuutaasinnaanersoq, ilinniarfiit ataasiakkat nalilersortarpaat.
