Palle: Angajoqqaat nooqataasinnaasariaqarput
Meeqqat iluameersumik piginnnaasaqalerfiusumillu atuartineqarnissaat siunnersuummi siunertarineqarpoq.
- Isumagaara atuartut 7. aamma 8. klassimi atuartut, inissiani najugaqartinneqassasut, angajoqqaavilu tassani najugaqarnissamut periarfissaqassallulik. Tassalu meeqqat 7. klassilerunik angajoqqaatik qimassanngilaat, soorlu ilarpassui taama isumaqaraluartut. Palle Christiansen oqarpoq.
Atuartut 9. aamma 10. klassimi atualerunik ineeqqami namminneq ineqarnissaat takorloorpaa, soorlu ullumikkut aamma taamattoqartoq.
- Tassalu angajoqqaat meeqqatik najuinnarusukkunikkit, illoqarfimmi inissarsiornissamut ukiuni marlunni periarfissaqarput. Ilaqutariit taamaalillutik meeqqap atuarnera tamaat ilagiinnissamut periarfissaqassapput, Palle Christiansen nassuiaavoq.
Taassuma takorloorpaa, atuartunut angerlarsimaffeqassasoq, perorsaanermik ilinniarsimasunit ulloq unnuarlu nakkutigineqartunik, ersarissunillu malittarisassaqartunik, atuartut taamaalillutik isumannaaatsumi najugaqarlutik toqqissisimasinnaallutik.
Tassalu ukiuni sisamani naparliinnartoqassanngilaq. Qanga kukkussutaasarsimasut ilinniarfigisariaqarivut, Palle Christiansen oqarpoq anngillunilu isuma nutaajunngitsoq eqqaallugu.
- Oqartoqartarput, meeqqat najugaanniit aallarullugit allami atuartinneqarsinnaanngitsut. Kisianni taamaaliortoqartareerpoq. Meeraq Sisimiuni atuarsimaguni, Aasianni præparandklassimi atuassaaq, Nuummilu Realskolemi kingornatigut atuarluni. Taamannallu atuarsimasorpassuit ullumikkut ilinniagarissaartuupput. Meeqqanik ilinniartitaanikkut qimataasoqarnissaa kissaatiginngilara. Meeqqat tamaasa periarfissikkusuppakka, Palle Christiansen oqarpoq.
Taassuma siunnersuutaa isornartorsiorneqarpoq, isumaqartoqarluni nunaqarfinnik inuerusaaniarnermi meeqqat sakkugineqartut. Kisianni Palle Christiansenip taamaannginnerarpaa:
- Uanga Meeqqat atuartinneqarnissaat siunissamilu ilinniarnissamut periarfissaat eqqarsaatigaara. Meeqqallu angajoqqaaminnik najuisinnaannginnerat ajornartorsiutaappat, taava imminnut najorsinnaanngorlugit sinaakkuseerusuppunga, ilinniartitaanermut naalakkersuisoq oqarpoq nangillunilu:
- Kollegialioraani ataasiakkaanik initalimmik atuartunulluunniit angerlarsimaffilioraanni inissiartalimmik assigiippoq, aallaqqaataaniit aalajangernissaq apeqqutaaginnarluni. Aningaasarpassuimmi kollegialiornermut maannakkut atortareerpavut. Aamma akileraartarnermut atugarissaarnermullu ataatsimiititaliaq isumaliutissiissummini iliuusissarpassuarnik inassuteqarpoq, ilaatigut utoqqalinersiutinut aningaasaliissutit ikilinerisigut aningaasalersorneqartussanik, Palle Christiansen oqarpoq.
Palle Christiansenip aamma takorloorpaa, nunaqarfimmiut atuartinneqartarnerisa nutaassap nuna tamakkerlugu atuutilernissaa eqqarsaatigilersinnagu, misiliilluni suliniutitut aallarnisarneqassasoq, assersuutigalugu Sisimiuni Tasiilamilu.
