Palasitut atorfiit nutaamik aaqqissuunneqartariaqalerput

Palaseqarniarnerlu nutaamik aaqqissuunneqartariaqalersoq, Biskoppi Sofie Petersen isumaqarpoq.

- Palaseqarfiit inuttussusii piinnarnagit, kisianni nunaqarfeqassusii aamma tikikkuminaassinnaassusii eqqarsaatigalugit qassinik palaseqarnissaq, illoqarfinni assigiinngitsuni eqqarsaatigineqartariaqartoq, Biskop Sofie Petersen oqarpoq.

Kalaallit Nunaanni palasitut atorfiit katillugit 30-usut ilaat arfineq marluk maanna inuttaqanngikkallarput.

Upernavik palaseqanngitsut ilagaat, tamannalu ilagiinnut naammaginanngitsoq, biskoppi isumaqarpoq. Nutaamillu aaqqissuussisoqartariaqalernerarpaa.

- Upernavik isorartoorujussuuvoq palasilu ataasiinnaavoq aamma Nanortalik nunaqarfippassuaqaraluarluni Upernavimmisulli isorartutiginngilaq, tassa nalilersuinerit allat aallaaviusariaqarput inuttussuseq aallaavigiinnarnagu, biskoppi, Sofie Petersen oqarpoq.

Palasit ilagiinnik sullissinerat aamma nutarsartariaqarsoraa. Palasit immikkut sammisaqarlutik ilagiinnik sullissisinnaanerat eqqarsaatigivaa, soorlu meeqqanik inuusuttuaqqanillu sammisaqartumik aamma napparsimasunik oqaloqatiginninnissaminut pikkorissarsimasumik palaseqarsinnaaneq assersuutigaa.

- Napparsimasunik oqaloqateqarsinnaaneq pillugu nalunngilarput pisariaqartitsisoqartorujussuusoq. Kræftertunik, immaqa HIV, AIDS-ertunik tassanngaannaq toqusoortunik immikkut pikkorissarsimasumik palaseqartitsisinnaanissaq. Uagummi palasit imminut pilluta sullissinngilagut ilagiinnuku sullikkigut, Sofie Petersen oqarpoq.