Palasissaaleqineq iluarsiivigeqquaa

- Ullumikkut palasiusut suliassaqartorujussuupput, ingammik illoqarfimmi marlunnik palaseqartussagaluartumi ataasiinnarmik palasilimmi palasi ulapittaqaluni, Ruth Heilmann paragraf 37 tunngavigalugu Naalakkersuisunut apeqquteqaammini tunngavilersuilluni erseqqissaavoq.

Ilaqutariinnermut, Kultureqarnermut, Ilageeqarnermut Naligiisiitaanermullu Naalakkersuisoqarfiup nittartagaani allassimasoq naapertorlugu ajoqit ilinniarsimasut 57-upput 26-it ilinniarsimasuunatik. Ajoqillu tassaapput palasinit 26-usunit tapersorsorneqartartut.

- Palasit ulapittaqingamik nunaqarfimmut angalanissatik allaat piffissaqarfigiunnaartarpaat, Ruth Heilmann nassuiaavoq. Erseqqissaavorlu tamanna ajoqit ilaatigullu ilagiinnut sinniisuusut sulerulunnerannik kingunerluttartoq.

Inatsisartunut ilaasortaq Ruth Heilmann aamma aperivoq palasissanik immikkut ilinniartitsineq siornatigut atorneqarsimasoq, ullumimut iluaqutaasumik kinguneqarsimasoq, palasissaaleqineq anigorniarlugu atoqqinneqarsinnaannginnersoq.

Ilaqutariinnermut, Kultureqarnermut, Ilageqarnermut Naligiisitaanermullu Pisortaqarfiup nittartagaani allassimavoq palasissamut ilinniartitaaneq tassaasoq ukiuni pingasuni bacheloritut Nuummi Ilimmarfimmi ilinniartitaanerusoq. Danmarkimi qaammatini arfinilinni palasinngorniarluni ilinniarneq aqqutigalugu palasitut sulilernissamut ammaassisutut periarfissiisuulluni. Aamma Københavnip Universitetiani palasissamut kandidatinngortoqarsinnaalluni.

Palasitut atorfinnut qinnuteqarniaraanni, qinnuteqaat Namminersorlutik Oqartussanut kingusinnerpaamik pingasunngorpat februaarip 15-ani nassiunneqareersimassaaq.