Paasisat nutaat

Nunarsuatta avannarpasinnerusortaani (issittumi) issinneruleraangat Qalasersuaq Kujalleq kiatsinnerusarpoq. Akerlianillu aamma pisoqartarluni.

Nunarsuup issittortaanni silaannaap kissassusaata allanngorarnera pissusissamisut ingerlaartillugu taama pisoqartartoq, sermersiuut misissuinerminni paasisimavaat, atuagassiamullu Nature-imut saqqummiullugit.

Dansk Polarcenter taama allappoq.

Inernerit taakku nutaat ersersippaat uppernarsarlugulu, nunarsuup kaaviffiini kissassuseq annertorujussuarmik puumigaartartorlusooq, imarpissup Atlantikup sarfarneranit aqunneqartutullusooq illuni. Kujasinnerusumi silaannaap kissassusiata allanngorarneri sivikillutillu annikinnerugaluartut avannarpasinnerusumi silaannaap sukkasuumik allanngorartarneranut atasut aamma uppernarsineqarpoq.

Ilisimatuut Qalasersuarmi Kujallermi sikumi qillerillutik piiaanerminni, piiakkaminnillu kingornatigut misissueqqissaarnerminni, inernerit taakku pissarsiaraat.

Kalaallit Nunaaata sermersuanik misissuinerit qangali takutererpaat, Issittumi kissassuseq ukiut qulikkuutaat arlaqanngitsunnguit ingerlaneranni 16 gradi allaat tikillugu kissarnerulersinnaasoq.

Nunarsuup kaaviffiini silaannaq siunissami qanoq ittuussanersoq paasisat nutaat atorlugit ilaatigut naatsorssuusiorneqarsinnaassasoq ilimagineqarpoq.