Paasiniaaneq suli ingerlasoq
Erseqqissumik suli ilisimaneqanngilaq sooq 29-nik ukiulik saassussisimanersoq, politiilli paasiniaanerminni maannamut sassussineq peqqarniisaarniarnertut misissuiffigaat.
Aamma atuaruk Orlandomi imerniartarfiup saassunneqarnera pillugu ilisimasavut
Aammattaaq radioqarfiup peqqarniisaarnianut Islamisk Statimut attuumassutillip nalunaarutigisimavaa saassussisoq tassaasoq namminneq sorsuttartumik ilaat.
Paasiniaasulli maannamut Islamisk Statimut attuumassuteqarsimasinnaaneranik suli pasinartorsinngillat, imaluunniit saassussinissaq pillugu Islamisk Stat ilisimasaqarsimanersoq, DR-imi nutaarsiassaniit nalunaarput.
Suiiaqatiminoortut unnuakkut nuannaarniartarfianni Pulsimi saassussisup aallaat eqqarasuartaat atorpaa.
Taamatuttaaq peqqarniisaarniat Parisimi kingullermik saassussigamik eqqarasuartaatit atorpaat. Taamaattumik EU'p nunani ilaasortamini tamani sakkuuteqarsinnaaneq pillugu inatsit sukannernerulersinniarpaa.
EU'p inatsisinik atuutsitsinermut ministeriisa sapaatip akunnerata siuliani isumaqatigiissutigaat, malittarisassat qanoq isikkoqartariaqarnersut, DR-ip EU-mi ilanngutassiortua Ole Ryborg oqaluttuarpoq:
- EU-mi inatsisartut peqataatinnissaat tullinnguuppoq. Taamaattumik imaassinnaavoq EU-mi malittarisassat nutaat ukioq manna naatinnagu naammassineqarsinnaasut, Ole Ryborg taama nalunaaruteqarpoq.