PISUT Orlandomi imerniartarfiup saassunneqarnera pillugu ilisimasavut
Floridami Orlandomi siuaqatiminoortunut imerniartarfimmi arfininngormat unnuakkut angut saassussimmat inuit ikinnerpaamik 50-it toqutaapput 53-illu ikiligaallutik.
Qanoq pisoqarsimanersoq uani atuarsinnaavat.
* Saassussineq unnuakkut nal. 2.00 missaani aallartippoq.
* Pulsemi, Orlandomi imerniartarfiit anginersaasa ilaanni, Latinamerikamiusut unnukkut taanna sammisaqarfiusumi, fiisti naammassilersoq angut eqqaassileriasaarpoq.
* Imerniartarfik Facebookimi quppernermini kinguninngua ima allappoq: "Pulsemit tamassi anillagitsi, arpallusilu qimaagitsi."
* Politiinit tusarfiit ilaasa amerikami tusagassiorfinnut oqaluttuaraat saassussisoq pasinarsinnaasumik timiminiititaqartoq.
* Saassussisoq politeerlu imerniartarfimmi sulisuusoq aamma imminnut eqqaassimapput, tamannali imerniartarfimmi silataaniluunniit pisimanersoq nalunarpoq.
* Saassussisoq sallunaveeqqutissaminik tigusarinnippoq, politiillu ullaassakkut nalunaaqutaq tallimanngortoq illorsuarmut iserterput ilaatigut "nakkutigisamik qaartitsillutik".
* Saassussisoq toqutaavoq, politiillu ippassaq sapaammi unnukkut oqaatigaat inuit ikinnerpaamik 50-it toqutaasimasut, amerikallu oqaluttuarisaanerani inuppassuarnik toqutsinerit annersarigaat.
* Ikiligaasut ikinnerpaamik 53-iummata toqusut amerlanerulersinnaapput.
* Peqqarniisaarniaqatigiit Islamisk Stat (IS) namminneq tusagassiorfitsik Amaq aqqutigalugu sapaatiummat unnukkut nalunaarutigaat toqoraanermut akisussaasuullutik.
* Saassussisoq tassaavoq 29-nik ukiulik Omar Mateen afghanistaminiunit kingoqqisoq, Fort Piercemi Orlandop kujataani nal ak. marlunnik ungasitsigisumi najugaqartoq. New Yorkimi inunngorpoq.
* Omar Mateen FBI-mit 2013-imi alaatsinaanneqalerpoq. Arlaleriarlugu apersorneqaraluartoq ilumut ulorianaateqarnersoq paasineqarsinnaasimanngitsoq FBI-mit oqaatigineqarpoq.
* Omar Mateenip Islamisk Statimik illersuinerminik siornatigut oqaaseqarsimanera FBI-mit uppernarsarneqarpoq. Aammattaaq ilisimatitsissutigineqarpoq aallaasinik marlunnik sapaatit-akunnerata siuliani pisisimasoq, tamannalu inatsisinik unioqqutitsinertaqanngitsoq.
* Amerikamiut præsidentiata Barack Obamap sapaatiummat unnukkut oqaatigaa saassussineq peqqarniisaarniarnertut taasariaqartoq.
Najoqqutarisat: BBC, AFP, Fox News aamma Reuters
/ritzau/