Paasiniaaneq amigarpoq

-  Tassa immaqa arlaata ilisarisinnaasimassagaluarpaa. Imaappoq maani uagut imaani angalaartartuusugut nunaqqatigiit, radioaqqakkut kalderingaangatta (nalunaaruteqaraangatta. Aaqq.), atini taanngikkaluaraaluunniit ilisarisarpagut. Immaqa tusarnaartinneqarsimasuupput arlaata ilisarisinnaasimassagaluarpaa taanna nipi, Saqqarmiu aalisartoq Ole Zeeb oqarpoq.

Taassuma Politiit Saqqami Qeqertamilu ajunaalernermi kalerrisaarinermut tunngatillugu paasiniaanerat amigarsoraa, tassami nammineq politiinit apersorneqarsimanngilaq aamma ajunaalernermik kalerrisaarisup nipaanik tusaatinneqarsimanani, naak Saqqami politiit takusimagaluarlugit. Radioaviisimiillu Qeqertami aalisartut allat paasiniaavigineqartut Politiinit apersorneqarsimanatik nipimillu kalerrisaarisumik tusartinneqarsimanatik aamma oqaatigaat, nipilu ajunaalernermik kalerrisaarisoq tusarneqarusukkaluarpoq.

Ole Zeeb nassuiaavoq ajunaalernermi kalerrisaarineq eqqartorneqallatsiartartoq, nipilu tusaaneqarsimasuuppat aalisartut akornanni eqqoriarneqarsimasinnaagaluartoq  oqaartigineqartartoq. Ulloq taanna MayDayimik kalerrisaarisoqarmat Ole Zeeb Saqqami neqitsersuivoq.

- Uanga nipi tusaanngilara taanna, Ulloq taanna neqitsersorpunga, sissami. Aamma allat aalisartut neqitsersorput ilai amorrapput, qattungasorujuungami ulloq taanna. Naluara allat tusaasimaneraat, maydayimik kalerriineq, Ole Zeeb nassuiaavoq. Politiit paasiniaanerminni iluatsitsisimanatik radioaviisimut tallimanngormat oqaatigaat. Saqqamili paasiniaaneq Ole Zeebip apeqquserpaa.

- Isumaqarpunga eqqornerusumik tusagassiuutitigut nalunaarutigineqartariaqartoq, ilumut paasiniaasimanerlutik maani Saqqami. Taanna oqaatigineqarami, paasiniaagaluaraminngooq kinguneqanngilaq. Tassa eqqunngittuuvoq. Tusarniaasoqanngilaq maani Saqqami, Politiit maaniikkaluarput. Ole Zeeb oqarpoq.

Taamaattorli Saqqami Qeqertamilu innuttaasut ajunaalernermi asuleerluni kalerrisaarinermut tunngatillugu politiit nunaqarfinni paasiniaammata saaffiginninngillat, Ilulissat Politiianneersoq Karl Vinther oqarpoq.

- Innuttaasut nalunngikkaluarpaat tassaniittugut, kisianni saaffiginnittoqanngilaq, Karl Vinther oqarpoq.

Ajunaalernermilu kalerrisaarinermut tunngatillugu Politiit paasiniaanerat kinguneqanngilaq, tassalu Politiit annaassiniarnerigaluamut aningaasarpassuit piffissarlu annertooq atorsimavaat.