Paarisa: Oqaloqatigiinneq ersisaarinermiit pingaarneruvoq
TV-kkut takoqqusaarummi illu qarmanik ujaqqanillu sanaajusoq kamillisaartunik inuttaqartinneqartoq, inuusuttunit pikkunaagineqarpoq.
- Takoqqusaarut taanna kikkunnut tamanut saaffiginnittuuvoq. Aanaakkut aataakkut angajoqqaallu takoqqusaarummik isiginnaarsimasut inuusuttatik aperisinnaavaat eqqasillugillu usuup puuinik atunngikkaanni qanoq kinguneqarsinnaanersoq, Bodil Karlshøj oqarpoq.
Inuusuttut takoqqusaarummik isornartorsiuisut paasivagut, aamma inuusuttut allat taakkutulli isummersimassasut naatsorsuutigaarput, Bodil Karlshøj oqarpoq.
Taanna oqarpoq usuup puuisa atorneqarnissaannut kajumissaaruteqarneq tiguaaniartussaasoq, tamannalu assigiinngitsutigut iliorluni sammineqarsinnaanerarpaa.
- Inuusuttut takoqqusaarummit tiguarneqarsimanngippata neriuutigaarput aanaakkut aataakkut angajoqqaalluunniit isiginnaarsimagunik inuusuttatik eqqaasissinnaavaat, Bodil Karlshøj oqarpoq.
Taanna oqarpoq tv-kkut takoqqusaarutit kikkunnit tamanit isiginnaarneqartartut.
Inuusuttut usuup puuinik atuinissamik kajumissaarummik tupannartumik annilaarnartumillu takusaqarusullutik oqarpoq. Tamannalu pillugu Bodil Karlshøj Poulsen ima oqarpoq:
Paasititsiniaaneq atuaqatigiit iluanni, angajoqqaat qatanngutilluunniit angajulliunerusut peqatigalugit oqaluuserineqarsinnaavoq. Kinguaassiutitigut nappaatit, soorlu gonorré, amerlasuunit nappaatigineqartarput, aamma clamydiamik nappaateqarsimasut usuup puuisa atorneqannginnerisa kinguneri pillugit oqaluttuarsinnaapput.
Nuummi nakorsiartarfimmi pisortaq Jesper Olesen oqaluttuarpoq nakorsiartarfimmi sulisut atuarfinni paasititsiniaasinnaasut atortunillu tunniussaqarsinnaallutik.
- Tamannalu sinerissami napparsimavinni aamma periarfissaasoq nalunngilara, Bodil Karldhøj Poulsen oqarpoq.
Pinaveersaartitsinermik suliaqartut sinerissami paasititsiniaanissaminnik piareersimapput, aamma paasititsiniutit amerlasuut pisariaqartinneqartut sinerissamut nassiussuunnikuuagut, Bodil Karlshøj Poulsen oqarpoq.
