Paarisa: Nittartagaq IGGU.GL atorluarneqarpoq

Amerlanerpaat aatsaavissuaq atuisuupput, immaqa napparsimmavimmut peqqissaavimmulluunniit usuup puuinik aallernissamut ittoortut, taama Paarisami pisortaq Bodil Karlshøj Poulsen oqarpoq:

- Inuusuttut apersornerini paasigatsigu usuup puuinik ajornaquteqanngitsumik pissarsinissaq amigaatigineqartoq, nittartagaq pilersipparput. Ilaasami napparsimmavimmut, nakorsiartarfimmut imaluunniit peqqissaavimmut saaffiginninnissartik ittoorisarpaat. Taamaammat nittartagaq atorlugu inniminniisinnaaneq siorna ammaapparput, Bodil Karlshøj Poulsen oqarpoq. iggu.gl aqqutigalugu inniminniisunut poortukkat 30-t 50-illu akornanniittut Paarisap sinerissamut sapaatip-akunneri tamaasa nassiussuuttarpai. Poortugaq ataaseq usuup puuinik qulingiluanik imaqartarpoq. Aamma ilinniarfiit pinaveersaartitsinermillu suliallit usuup puuinik karsikkaanik immininniisarput, usuup puuinik pingasukkaanik 800-inik imaqartartunik. Bodil Karlshøj Poulsenip assut nuannaarutigaa nittartagaq siunertamut atorluarneqarmat. Paarisammi tv-kkut iggu.gl pillugu ussassaarutaa qanganitsersimasutut inuusuttunit uparuarneqaqqammerpoq.

- Nittartagaq qaammatini qulini atuunnermini iluatsilluarpoq. TV-kkut takoqqusaarusiaq nittartakkap www.iggu.gl-p, isumannaatsumik atoqatigiinnermik aamma kinguaassiutitigut nappaatinik paasiniaaffissattut kiisalu usuup puuinik akeqanngitsumik piniarfissatut ammajuarneranik oqariartuuteqarpoq, Paarisami pisortaq erseqqissaavoq.

Bodil Karlshøj Poulsen aamma oqarpoq, nittartakkami pulaartut isummersorsinnaasut. iggu.gl kalaallisuinnaavoq, qallunaatulli oqaasertalik kingusinnerusukkut pilersinneqarumaarpoq.