Paarisa: - Naartuliaartarnermi pinaveersaartitsinermi pikkorinnerusariaqarpugut
Else Christensenip Nunatsinni misissuinermini arnat 1000-it apersorsimavai, apeqqutaasa ilagaat qassinik ukioqarlutik meerartaaqqaarsimanersut. Pingajorarterutaat akisimapput 18-iliitinnatik meerartaaqqaarsimallutik. Kisitsisit assigajai Paarisap Grønlands Statistikkillu pigai.
Suliamik Ataqatigiissaarisoq Paarisameersoq Birgit Hansen Ilaqutariinni naartusortalinni siusissumi iliuuseqarneq pillungu sulialik oqarpoq, qanoq naartujaartarneq pinaveersaartinneqarsinnaasoq:
- Pisariaqartippaat inuunerissaarnissaq, angajoqqaat isumaginnilluartut, takuneqarnissartik malugineqarnissartillu. Pisariaqartippaat atuarfik pitsaasoq ilinniartitsisullu ilinniarsimasut sunngiffimmilu neqeroorutit pitsaasut.
Qaammatip tulliani Paarisa Ilulissani pikkorissartitsissooq ilinniartitsisunut peqqinnissaarfimmilu sulisunut kinguaassiuutitigut atuartitsineq inuusuttuaqqat akornanni nukittorsarniarlungu. Namminersorlutik Oqartussat, atuarfiullu napparsimaveqarfiullu akornini kinguaassiuutitigut atuartitsinermi ataqatigiissaarisoqanngilaq. Ilinniartitsisut peqqinnissaqarfimmilu sulisut tamarmik periarfissaqarput pikkorisarnermi peqataassallutik 27-llu nalunaarsimapput peqataaniarlutik.
- Ersarinngilaq kiap suna akisussaaffigineraa. Atuarfinni Inuttut Ineriartornermi kinguaassiuutitigut atuartitsioqartarpoq. Peqqinnissaqarfik aamma peqataatinneqartarpoq. Suleqatigiinneq nukittorsartariaqarpoq, Birgit Hansen oqarpoq.
Suliniutit amerlanerit illoqqarfinni avinngarusimasuni nunaqarfinnilu ajornartoornerni ikiueqqaarnerupput paasititsiniaanerullutillu. Neqeroorutitit ataavartut illoqarfinni avinngarusimasuni Qaanaami, Tasiilami Ittoqqortoormiuni nunaqarfinnilu amingaataapput. Suna peqqutaanersoq Birgit Hansen oqarpoq:
- Perorsaanermi ilinniagaqarsimanngikkaanni oqitsuinnaanngilaq atuartitsinissaq. Ilinniakkap qaavatigut pikkorissartarneq oqinneruvoq. Ilinniartitsisutut peqqinnissaqarfiulluunniit iluani ilinniagaqarsimagaanni qaavatigut pikkorissartarneq oqinneruvoq.
Kisianni Birgit Hansenip nassuerutigaa Paarisa Nunatsinni naartujaartarneq pillungu pinaveersaartitsineq pikkorinneruffigisinnaallungu.
- Qularnanngitsumik pikkorinnerulertuaannarsinnaavugut aamma tamanna sulissutigaarput. Nalunaarusiaq atorsinnaavarput immitsinnut aperilluta "qanoq isilluta pikkorinnerulersinnaavugut", Birgit Hansen oqarpoq.
Paarisa pingasunik naartujaartarneq pillungu suliniuteqarpoq taajuuteqarpullu: Ilaqutariinni naartusortalinni siusissumi iliuuseqarneq, Inuusat atorlungit suliniut Meeqqamullu Piareersarneq.
