Paamiut takornariaqarfiorusuppoq

Paamiuni nutaaliaasumi akunnittarfeqarpoq unnuiffissallu allat arlaqarlutik. Taamaakkaluartoq illoqarfik takornariaqarfiunngilaq. Tamannali allanngortinniarneqartoq Kommuneqarfik Sermersooq nittartakkamini nalunaarpoq.

Inuussutissarsiutinik inerisaanermut Kommuneqarfik Sermersuumi immikkoortoqarfik ulluni makkunani Paamiuniititsivoq illoqarfiup takornariaqarnermut sassaalliutigisinnaasai aalajangersaaqataaffigiartorlugit. Pilersaarutaavoq takornarianut neqeroorutaasinnaasut nunat avannarliit killiit takornariaqarnermi nuisitsineranni Vestnorden Travel Mart-mi Savalimmiuni septemberip qeqqani saqqummiunneqassasut.

Innuttaasunik ataatsimiisitsisoqartarsimavoq taamaasillutillu innuttaasut periarfissaqarsimapput takornariaqarnermik siuarsaanissamut eqqarsaatinik immersueqataanissamut.

- Angallammik akuerisaasumik peqannginnera akueralugu illoqarfik imarisaalu aallaavigalugit – minnerunngitsumillu illoqarfiup avatangiisiata takornarianut tunniussinnaasai aallaavigalugit ineriartortitsinerit ingerlappagut, taamatut oqarpoq Inuussutissarsiutinut Inerisaavimmi ingerlatsisuusoq Marie Fleischer Kommuneqarfik Sermersuup nittartagaanut.

Takornariaqarnerup inerisarnissaata nassuiaasiornerani qanimut suleqatigaa takornariaqarnermut siunnersorti Helga Lorentzen.