Paamiuni, Nuummi Sisimiunilu anorersuarnissaa: Pigisavit qujannaarsornissaat eqqaamajuk
Nasat isarussallu paarilluarsigit. Nunatta kitaani anorersuarnissaa ilimasaarutigineqarpoq.
DMI-p silasiorfia naapertorlugu Paamiuni unnugu nalunaaqutaq 21.00-ip missaani anorersualeriartulissaaq.
Tamatuma kingorna anorersuaq avammut Qeqertarsuatsiaanut, Nuummut Sisimiunullu ingerlaassaaq. Anoraa pingasunngornermi unnukkut nalunaaqutaq 21.00-ip missaani annikillissaaq.
Anoraasuaq ulussaarsuartut sakkortutigaluni sekundimut 35-t 39-llu akornanni sakkortussuseqassaaq.
Politiit tassunga atatillugu inuit pigisaminnik isumannaarsuinissaat kaammattuutigaat.
Pingaartumik suliffeqarfiit sanaartorfiillu isumannaarsuissapput.
- Pigisat teqqaasut inunnut illunullu navianarsinnaasarput. Tamatuma saniatigut innuttaasut pigisaminnik anorersuannginneranni isumannaallisaanissaat kaammattuutigaarput.
- Aammattaaq umiatsiaatillit umiatsiaatiminnik nakkutiginninnissaat kaammattuutigaarput, umiatsiammi aporaannissaat, avalannissaat kivinissaalluunniit aarlerinarsinnaammat.
Kalaallit Nunaanni Politiit Facebookimi quppernerminni allapput.
Nukissiorfiit upalungaarsimanermik piareersimasut
Nukissiorfiit oqarnerat naapertorlugu Nuummiittut innaallagiamik qamittoornissaq ernumassutigineqartariaqanngilaq, qamittoortoqassagaluarpalli Nukissiorfiit piareersimaniarput:
- Nukissiorfiit qamittoortoqarnissaa naatsorsuutiginngilaat, kisianni qanittoortoqariataassagaluarpat soorunami upalungaarsimanermi piareersimavoq, nukissiorfiit mailikkut allapput.
Nuummi novembarip naanerani decembarip aallartinneranut ulluni arlalinni qamittooqattaangaatsiarpoq. Nukissiorfiit illoqarfiit pingaarnersaanni Utoqqarmiut Kangerluarsunnguannut erngup nukinganik nukissiorfimmut attaveqaataat kabeli anorersuaneranit ajoquserneqarnerat pissutaavoq.
Qamittooqqaneq ataannartumik sivisunerpaagami akunnernik 18-inik sivisussuseqarpoq, Nuullu tamarmi qaminngalluni. Taamani attaviit atassutaanni kukkusoqarnera aamma pissutaavoq.
Nukissiorfiit maanna innaallagiaqaannarnissaq ullumikkut naatsorsuutigaat.
