Paamiuni iffiorfituaq oqartussanit matuneqarpoq

Iffiorfiup matuneqarnera pillugu uumasut nakorsaasa pisortaat Mads Thor Madsen ima oqarpoq:

- Innuttaasut inuussutissanik iffiorfimmeersunik atuinerannut atatillugu aarlerinaateqartoqarsinnaammat iffiorfik matusariaqarsimavarput. Uumasut ajoqutaasut pissutaasinnaapput, illutaatali ajoquteqarnera amigaateqarneralu aamma pissutaasinnaavoq, Mads Thor Madsen Radioaviisimut oqarpoq, uumasupiluit soorlu terissat allallu siumorneqarsimagaangata inuussutissaleriffiit matuneqartartut oqaatigalugu.

Uumasut nakorsaasa nalinginnaasumik misissuineranni Paamiuni iffiorfik malunnaatilimmik ajornartorsiuteqartoq paasineqarpoq, ingerlaannarlu matuneqarluni.

Qaqugu ammaqqissinnaanersoq nalunarallarpoq, iffiorfiulli nammineq iliuuseqarnissaa tullinnguuppoq, uumasut nakorsaasa pisortaat oqarpoq.

Akuersissummik nutaamik tunineqarnikkut tamanna pissaaq. Iffiorfiup ammaqqinnissaanut suut naammassisariaqarnersut allagaqaammi allassimavoq.

Oqartussanut saaffiginninikkut tamanna pissaaq, oqartussallu kingorna aalajangissavaat naammassisassat naammassineqarsimanersut.

Paamiuni iffiorfiup matuneqarnissaa qangalili eqqarsaatersuutigineqarsimasoq, bakeoffimillu taaguutilimmik taarserneqassasoq, KNI-p pisortaata Frederik Olsenip oqaatigaa, illoqarfinnili allani sanaartornissaq pissutigalugu aalajangiinissaq kinguartinneqartarsimasimanerarlugu.

Paamiuni iffiorfiup matuneqarnerata kingunerisaanik Brugsenimi bakeoffikkut iffiat kisiisa Paamiuni pisisartut isumalluutigilerpaat.