Isiginnaartitsisartunngorniap kiserngoruttup ilinniarfik isornartorsiorpaa
Reumertimik nersorinninniutinik agguaasoqarnerani kalaallimik isiginnaartitsisartumik siullermeertumik juunimi nersorinnittoqarpoq.
Isiginnaartitsisunngorniarfimmili ingerlanerluttoqarpoq, tassami ilinniartoq ataasiinnanngorsimammat. Isiginnaartitsisunngorniat tallimat ukioq kingulleq ilinniarfimminni aallartikkaluarput, sisamalli ilinniarnerminnik unitsitsisimapput.
Isiginnaartitsisunngorniani kisiartaalersimasoq Paalit Mølgaard isumaqarpoq Isiginnaartitsisartunngorniarfimmi pisortaq allanngormat ilinniarfiup ingerlanneqarnera aamma allanngungaatsiarsimasoq. Paaliip ilaatigut oqaluttuaraa ilinniartut aqutsisuminnut saaffiginnikkaangamik illaatigineqartutut misigisimasarsimasut.
- Ilinniartitsisoqartarpugut tuluttut oqaasillit aggustimili aallartikkatta siornali aamma ajornartorsiutaanngilaq. Taava kisianni atuarfiup ingerlatsineranut tunngalerpat taava kalaallisut oqaaseqarluta ingerlasinnaanngilagut, Paaliit Mølgaard oqarpoq.
Ilinniartut ilungersunartorsiortut
-Ilinniarfiup piumasaqaataasa annerpaat ilaat tassaavoq kalaallisut oqaaseqartuusinnaaneq taavalu aamma pingaartitanut ilaavoq nunatsinni uagut naleqartitagut kulturerput aallaavigalugit ilinniarfik ingerlassasoq. Kisianni pisortat nikinnerisa kingorna taanna apeqqusernartorujussuarmik ingerlalernikuuvoq, Paaliit Mølgaard oqarpoq.
- Naleqartitagut uku ilinniarfiup pingaartitai taakkua qimallugit massakkut ingerlasoqalermat aporaanneq soorlu ilaatigut pilertarpoq nalimmassaqqittariaqartarneq pingaartitat assigiinngitsut aporaatilerneranni.
Ilinniartuni tallimaasuni ilinniartut sisamat ilinniarfiup ingerlanera pillugu naammagittaalliorsimapput.
Isiginnaartitsisunngorniarfiup pisortaata isornartorsiuineq pillugu oqaaseqarusunnersoq KNR-ip aperigaluarpaa. Isiginnaartitsisunngorniarfiup Susanne Andreasen, Nunatta Isiginnaartitsisarfiani pisortaq suleqatigisarpaa.
Isiginnaartitsisunngorniarfiup pisortaa sinnerlugu Susanne Andreasenip ilisimatitsissutigaa naammagittaalliorneq massakkut suliarineqaleruttormat oqaaseqarsinnaanngitsoq.
Ilinniarneq pillugu aqqutissiuussisoq pisariaqartinneqartoq
Ilinniartuni tallimaasuni sisamat uniinnarsimanerat pillugu ataasiakkaarlugit aamma oqaaseqarfigerusunngilai.
- Ilinniartut sisamat uninnerat ataasiakkaarlugit oqaaseqarfigisinnaanngilakka, taamaakkaluartorli ilinniartut peqanngikulasarnerannik napparsimakulasarnerannik ilaatigut peqquteqartoq oqaatigisinnaavara, Nunatta Isiginnaartitsisarfiani isiginnaartitsinermut pisortaq Susanne Andreasen oqarpoq ilanngullugulu oqaatigaa taamatut pisoqarnera assut ajuusaarutigalugu tamannalu suliarineqaleruttortoq.
- Ernumavunga. Taamatut pisoqarnera massakkut suliarineqarpoq. Siunissami allannguutissanik misissuivugut, soorlu ilitsersuisarnikkut nalilersuisarnertigullu, Susanne Andreasen oqarpoq.
Isiginnaartitsisartunngorniarfimmi pisoq kipiluttunarpoq, kisianni nunatsinni ilinniarfeqarfinni allani aamma ilinniartussaaleqisoqartoq, pisortaq oqarpoq:
-Uagut kisitta ilinniartutitsinnik annaasaqarneq ajorpugut. Tamanna inuiaqatigiinni oqallisigisariaqarparput. Ilinniagaqalersut ilinnialernissaminnut piareersimappat? Ilinniartut ilinniartuutigiinnarnissaannut sunaana pisariaqartinneqartoq.
Isiginnaartitsisartunngorniarfik immikkut illuinnartumik iliuuseqarpoq tassalu aasakkut sulinngiffeqarneq qaangiuppat tallimanik nutaanik ilinniartuuteqalerniarpoq.
Ilinniartunngortussat Paaliit Mølgaardip ilinniaqatigilissavai, taassumalu ilinniarfimmi pitsanngoriaateqarnissaanut siunnersuuteqarpoq; ilinniarfimmi ilinniarneq pillugu aqqutissiuussisoqalernissaa. Ullumikkummi tamanna amigaatigineqarpoq:
- Ilinniarfimmummi isornartorsiuiniaraanni ilinniarfiup aqutsisuanut attuumassuteqanngitsumik oqaloqateqarnissaq pisariaqarluinnarpoq.
Ilinniakkamik taamaatitsisut amerlasut
Ilinniakkamik taamaatitsisarneq qaffasittoq, Naatsorsueqqissaartarfiup kisitsisaataasa takutippaat.
Ilisimatusarluni bachelorinngorniarfinni taamaatitsisut amerlanerupput, tassa aallartittut 30 procentii ilinniakkaminnik naammassinnittarput.
Ilinniakkaminnik naammassinnittartut amerlanerpaat tassaapput kandidatinngorniartut, taakkunannga 60 procentii ilinniagartik naammassisarpaat.