Nuka pisortatigoortumik arnanngorpoq: Misigisaq nuanneqaaq!
29-nik ukiulik Nuka Bisgaard inuunermini pingaaruteqarluinnartumik angusaqarpoq.
- Oqiliallaqaanga, misigisaq nuanneqaaq, Nuka Bisgaard oqarpoq. Taassuma CPR-normumini kisitsisit kingulliit sisamat allanngortippai. Nuka pisortatigoortumik arnanngorpoq.
- Misigisaq tupinnaqaaq.
Inatsisitigut suiaassutsimik allannguineq tassaavoq suiaassuserilikkatut pisinnaatitaaffeqalerneq pisussaassuseqalernerlu. Danmarkimi nunatsinnilu CPR-normu allanngortinneqaratigut inatsisitigut suiaassutsimik allannguisoqartarpoq.
Inatsisitigut suiaassutsimik allannguisinnaaneq septemberip aallaqqaataani 2014-imi akuerineqarpoq.
Allannguinermi 18-inik ukioqalereersimanissaq piumasaqaataavoq.
Najoqqutaq: Det Centrale Personregister
Tungaanulli aqqutaa imaannaasimanngilaq. Nuka Bisgaardip 17-inik ukioqarluni arnanik angutinillu atoqateqartartuulluni nassuerutigaa.
Ukioq ataaseq qaangiummat alloriaqqippoq. Suiaaqatiminoortartuulluni nassuerutigaa.
24-nillu ukioqarluni suiaassutsiminik allannguerusulluni aalajangiuppaa.
Allannguineq ukiut marluk qaangiummata aallartippoq.Taamanikkut Nuka iisartakkanik hormonilinnik iisisalerpoq.
- Alloriaqqippunga taava. Pisortatigoortumik arnanngorusullunga aalajangiuppara. Tassami taamatut misigivunga, Nuka Bisgaard oqarpoq.
Nuka: Taamaattussaannartut isigivara
Nuka kaffisorniartarfimmi Nuummiittumi Pascuccimi kaffisorujoorpoq. Isumaginninnermut Nunamullu Namminermut Ministereqarfimmut CPR-normuni allanngortinniarlugu qinnuteqarpoq.
Nukap atini taaguutaanngitsoq allanngortereernikuuaa. Nuka Carmen Bisgaardimik ullumikkut ateqarpoq.
- Allanngorneq angisoorujussuuvoq. Kisiannilu aapaatigut taamaattussaannartut isigivara.
Nuka Bisgaard qaammatini arfineq marlunni suliap naammassinissaanut utaqqivoq.
Apriilip aallaqqaataa. Ulloq Nukap inuuneranut allannguisoq. Ullormi tassani paasivaa qinnuteqaataa akuerineqarsimasoq.
- Illarnalaarpoq. Tassami netbankinnut borger.dk-mullu isersinnaajunnaarsiasaarama. Eqqarsarlunga: Susoqartoruna?
Ilanngutassiaq assip ataani nangippoq..
Pilatsinnikut suiaassutsini allanngortinniarpaa
Ministereqarfiup Nuka attaviginiarsaraa, oqaluttuunniarlugu qinnuteqaataa akuerineqarsimasoq. Mobiliali attaveqanngimmat attavigisinnaasimanngilaa.
- Inuuninni pingaaruteqarluinnartumik angusaqarpunga. Timera tarneralu kinaassusinnut qanilliallattoq misigivara, Nuka Bisgaard oqarpoq.
- Pingaauteqarluinnarpoq pissutigalugu inuit akornanni arnatut isikkoqarnera pappilissanilu angutaasutut allaqqanera nassuiartariaqarunnaarpara.
Nuka Bisgaardip pilatsinnikkut suiaassutsini allanngortinniarlugu pilersaarutigaa.
Pilatinnera piviusulersaarummut atugassatut filmiliarineqassaaq. Piviusulersaarut Nuka Bisgaardimut tunngasoq Space Rocket Nationimit suliarineqaleruttorpoq.
