Avannaata Qimussersui Qaanaarmiunit arfininngorpat peqataarngaarfiulertut
Avannaata Qimussersui 2021 Ilulissani arfininngorpat marsip ulluisa 27-anni pisussatut aaqqissuunneqassaaq. Qaanaamiillu siullerpaamik peqataasoqalerpoq. Tamannalu peqataarngaartussap nuannaarutigaa.
Qillaq Kristiansen Qaanaaminngaanneersuuvoq, taannalu Qimuggeq sukkanniuutitsimmat ajugaasuuvoq. Taassumalu avanersuarmiit peqataasoqaqqaalernera pissanngatigaa.
- Aap pissanganarpoq soorunami peqataalerluni tamakkununnga. Siornatigut qimussimik sukkanniukkaangata isiginnaartarsimavagut.
Qillaq Kristiansen taama oqarpoq.
Taassuma sukkanniuuffissami aqqutaa misiligareerpaa.
AAMMA ATUARUK Tunumiut Avannaata Qimussersuini peqataassanngillat
- Qimusserfissaq ippassaq tamaat peqateqarlunga uuttorpara. Suli kisimiillunga uuttunngilara. Aqqutaa naammappoq, kisianni pissanganarpoq sisunissarput, Qillaq Kristiansen ataasinngormat oqarpoq.
Avannaata Qimussersui ukiorpassuanngortuni unammisarput, aaqqissuisullu nunatsinni kalaallit qimmiinik qimmeqarfiit tamaasa tamatigut peqataatitaqartikkusuttarpaat. Aningaasalli aporfiusarsimapput.
Tasiilami qimmit akiuussuserneqarsimanngitsut
Qaanaaminngaanniit ukioq manna peqataasoqartussaagaluartoq, aaqqissuisut takorloortagaat aamma ukioq manna piviusunngornavianngilaq.
- Kiisami takorluugaq piviusunngornialerpoq. Kisianni ajoraluartumik qimmit kapuutaanut tunngasut ajoqutaallutik naammattumik naammassineqarsimanngimmata Tasiilap eqqaamiui ilaasinnaanngillat, Aasiammiut ilaasinnaanngillat, Kalaallit Nunaanni Qimussertartut Kattuffiata siulittaasua Johan Olsen oqarpoq.
AAMMA ATUARUK Aasiammiut Avannaata Qimussersuinut peqataassanngitsut
- Qimmeqarnermut inatsimmi allassimareerpoq qimmit inatsisit malillugit akiuussutissalerneqarsimanngitsut inoqarfinnut allanukaateqqusaanngitsut, Johan Olsen oqarpoq.
2017-mi januarip aallaqqaataanit inatsisitigut piumasaqaataalerpoq qimmit qimuttut tamarmik qimmit nappaataannut parvovirusimullu akiuussutissalerneqartassasut.
1980-kkullumi naalerneranni Qaanaap eqqaani qimmit nappaalallutik nungungajaapput. Iluliarmiut allallu qimminik tunissuteqarput piniartut inuussutissarsiumminnik ingerlassinnarsinnaaqqullugit.
Qimmit apeqqutaassappunaasiit
Avanersuarmmmiilli peqataasoqassaaq. Qaanaamiillu annguttut pingasuupput, Qillaq Kristiansen, Igaja Alataq kiisalu Peter Avike.
Qillallu ajorani apuunnissani kissaatigaa.
- Tassa apuukkuma ajornanga ajunngilaq, qimmit apeqqutaassappunaasiit, Qillaq Kristiansen oqarpoq.
Avannaata Qimussersui Qaanaamiit, Upernavimmiit eqqaaniillu, Uummannap sulluarmiuniit, Saqqaq Qeqertap anngunniuffianiit, Ilulissaniit, Qasigiannguaniit Sisimiuniillu peqataasoqassaaq.
