5000-nit ikinnerunngitsut Tyrkiami nunap sajorujussuarnerani ajunaartut
Tyrkiami Syriamilu inuit 5000-nit ikinnerunngitsut, Tyrkiami nunap ippassaq ataasinngornermi sajorujussuarnerani ajunaarsimapput.
Kisitsisit nutaat marlunngornermi saqqummersinneqartut tamanna takutippaa.
Tyrkiap præsidentiata tullersortaata, Fuat Oktayip, oqarnera naapertorlugu Tyrkiami inuit 3419-it ajunaarsimapput. Silap issinnera ilaatigut pissutaalluni annaassiniarneq ajornakusoortoq taassuma ilanngullugu oqaatigaa.
Inuit 1602-t Syriami ajunaarsimapput.
AAMMA ATUARUK Nunap sajunnerani annattut: Suaartarpaluttoqartarpoq - soriarsinnaanatali
Tyrkiami illoqarfiit Gaziantepip Osmaniyellu eqqaanni nuna ataasinngormat sajorujussuarpoq. Illoqarfiit taakku Tyrkiap Syriamut killeqarfianut 50 kilometerit missaannik ungasitsigisumiipput.
Nuna 17,9 kilometeritut ititigisumi sajuppoq.
Nuna Richterip nunap sajuttarneranik uuttuutaa naapertorlugu 7,8-mik sajuppoq, ukiullu hunnorujut kingulliit ingerlaneranni aatsaat taama sakkortutigisumik nuna sajulluni.
Tyrkiami 1939-mili aatsaat taama annertutigisumik ajunaarnersuaqartoq, Tyrkiap maanna præsidentata Recep Tayyip Erdoganip oqqaatigaa.
