Nunap sajunnerani annattut: Suaartarpaluttoqartarpoq - soriarsinnaanatali
![](/sites/default/files/styles/image_934x467/public/article_images/20230207-070521-l-3135x2181ma.jpg?itok=I05vobm1)
Tyrkiami nuna ataasinngornermi marloriarluni sajorujussuareersorlu annaassiniartoqaleruttorpoq. Inuit tuusintilikkaat nunap sajunnerani ajunaarput.
Annaassiniartartartut, namminerlu kajumissutsiminnik sulisut unnuaq naallugu ullaaq mannalu suliuarsinnarput. Inissiarsuit ilaat arfineq-marlunnik quleriilik nakkaannikoq annassimasinnaasunik ujaasiffigineqarpoq.
Tyrkiap kujammut kangisissortaani illoqarfiit eqqorneqartut ilaat tassaavoq Sanliurfa, inissiarsuimmi ilaat arfineq-marlunnik quleriilik tassani nakkaammat.
- Ilaqutariit nalunngisakka qarmakunik matoorussaasimapput, 20-nik ukiulik Omer El Cuneyd, Syrimiuusoq, Tyrkiamili ilinniartoq, nutaarsiassaqartitsivimmut AFP-mut oqarpoq.
AAMMA ATUARUK Tyrkiamilu nunap sajorujussuarnera Danmarkimi nunatsinnilu uuttortaatinit malugineqartut
- Ikingutima oqarasuaatikkut ullaaq manna nalunaaqutaq aqqarnup tungaanut suli akisarpaanga. Maannali akisarunnaarluni, suli matoorussaaqqavoq, taanna oqarpoq.
Illut nakkaannissaat ernummatigineqarmat inuppassuit silami unnuipput. Nuna suli sajuttaqattaarpoq, nunallu immikkoortuani tassani aamma ukiuulluni.
Tyrkiap kujammut kangisissortaani nunap sajoqattaarfiata nalaani ississiut 0 gradip missaaniippoq.
Inuit 5000-nit ikinnerunngitsut Tyrkiami Syriamilu ajunaarsimasutut maannamut nalunaarsorneqarsimapput, 24.000-nillu ikinnerunngitsut aqqunartiterlutik.