Ove Karl: Tamat oqartussaaqataanerat ataqqissavarput
Atuagassiat DVD-illu atorlugit Greenland Minerals & Energymit
inuiaqatigiinnut paasititsiniaaneq ICC-mit aamma Pinngortitaq avatangiisillu pillugit peqatigiiffimmit, Avatamit, isornartorsiorneqartoq Naalakkersuisunit oqaaseqarfigineqarpoq.
- Naalakkersuisut aggustimi septembarimilu uuraani pillugu tv-kkut takutitsipput. Aamma uuraani pillugu misissuititsisivugut saqqummiullugulu. Taamaammat Greenland Minerals and Energymit paasissutissanik siammarterisoqalernera, suliatta malitsigisaattut isigiinnarparput, aatitassaqarnermut Naalakkersuisoq Ove Karl Berthelsen oqarpoq.
Greenland Minerals and Energyp DVD-nik atuagassianillu siammarterinera politikerit tungaannit ajortutut isigineqanngilaq, tamanna kikkut tamarmik oqartussaanerattut isigineqaannarluni.
DVD-p imarisaani illuatungaannarsiortoqartoq Naalakkersuisunit naluneqanngilaq, taamaammat sunniutaasinnaasut allat, inuttaasunut paasititsiniutiginissaat Naalakkersuisut pisussaaffittut isigigaat Ove Karl Berthelsenip oqaatigaa.
- Soorunami suliffissuaqarfiup soqutigisani oqaatigerusutanilu naqisimaneqanngitsumik, soorlu DVD atorlugu saqqummiuppai. Taamaammat nalunngilarput, tamanna illuatungeqarsinnaasoq. Uagut Naalakkersuisuniit pisussaaffigaarput avatangiisinut sunniutaasinnaasut inuiaqatigiinnut paasissutissiissutigissallugit, Ove Karl Berthelsen oqarpoq.
