Ove Karl: Nunaqarfiit siunissami ikilisimassapput
Nunaqarfiit ikinnerusut, nunaqarfimmiullu suliartorlutik aallarallartartut nunaqarfinni ukiut 20-t qaangiuppata atasussani. Oqariartuutit ilaat taamaapput Naalakkersuisuni ilaasortaq Ove Karl Berthelsen, Inuit Ataqatigiinneersoq saqqummiussimmat Nunat Avannarliit Killiit nunaqarfiit isorliunerusullu pillugit isumasioqatigiissitsimmata.
Politikerit immikkullu ilisimasallit ataatsimut isumasioqatigiipput Nunat Avannarliit Killiit Nuummi isumasioqatigiisitsineranni Naalakkersuisullu sinnerlugit peqataapput Ove Karl Berthelsen (Inuit Ataqatigiit) aamma Anthon Frederiksen (Kattusseqatigiit Partiiat). Isumasioqatigiinnermi eqqartorneqarpoq ukiut 20-t qaangiuppata nunaqarfiit isorliunerusullu unammilligassaat periarfissaallu. Nunatsinni nunaqarfiit siunissaat pillugu Ove Karl Berthelsen saqqummiussivoq.
- Uanga oqalugiarninni oqarpunga nunaqarfiit ikilisimassasut. Nunaqarfiillu aningaasarsiornikkut inooriaatsikkullu napatilluarsinnaasut taakku piujumaartut. Aamma eqqaavara nunaqarfinni isorliunerusunilu inuussutissarsiorneq allaanerulerumaartoq, Ove Karl Berthelsen KNR-ip aallakaatitaanut Iterluaanaamut ataasinngornermi ullaakkut oqarpoq.
- Takorloorpara takornariaqarneq aatsitassat ikummatissallu eqqarsaatigalugit nunaqarfimmiut inuiaqatigiillu ataatsimut isigalugit suliffeqalersimassasut.Taamaalilluni aamma nuttarsinnaanermut periarfissat aaqqissuunneqarsimassasut. Nunaqarfik qimanngikkaluarlugu allamut suliartortarnerit takornartaajunnaarsimassasut. Taamaasilluni inuiaqatigiit nuttartuunerat, nuttartuartuunikuugattami, tamanna suli atuutissasoq, Ove Karl Berthelsen oqarpoq.