Ove Karl marloqiusamik inissisimasoq
(Nutaarsiassaq radioavisimi marlunngorneq nal. 18.30 ilanngunneqarpoq)
Inuussutissarsiornermut naalakkersuisup, Ove Karl Berthelsenip, Maniitsup taamani borgmestererisaa, Søren Lyberth, peqatigalugu suliffeqarfik assartuussisussaq, Kamma Aps, 2008-mi pilersippaa. Pilersaarutaavoq, suliffeqarfiup angallatassat, Alcoap aluminiumik Maniitsup eqqaani aatsitsiviliornissamik pilersaarutai piviusunngussappata amerlanerulersussat, isumagissallugit. Soqutigisanillu taamannak akulerisiisitsineq mianernarsinnaasoq, politikikkut malinnaasoq Sten Lund isumaqarpoq:
- Naleqqutinngitsutut isiginiarneqarsinnaavoq, politikeri aalajangiisartutut inissisimasoq, aamma aningaasarsiornikkut soqutigisaqarfigiguniuk, tassani aalajangiinissaq arlaatigut sunnerneqarsinnaanissaa pissutigalugu, Sten Lund oqarpoq.
Ove Karl Berthelsen inuussutissarsiornermut naalakkersuisunngorami, suliffeqarfiutimini siulersuisuniit tunuarpoq, tassanilu inissisimaffini ernerminut tuniullugu. Naalli Alcoap aatsitsiviliornissamik pilersaarutaa naalakkersuisoqarfimmini suliarigaluarlugu, suliffeqarfimmik suli piginneqataavoq.
Ove Karl Berthelsenip inuussutissarsiornikkut soqutigisai tamanit aatsaat qiviallaaneqalinngillat.
Ove Karl Berthelsen Naalakkersuisullu siulittaasua Kuupik Kleist siorna oqallisigineqarput, piginneqatigiiffimmut Greengemsimut, Nuup eqqaani ujaqqanik erlinnartunik ujarlertumut, attuumassuteqarnertik pissutigalugu.
Suliap taamani inerneraa, politikerit taakkua marluk suliffeqarfimmi susassaqarfiinut Ove Karl Berthelsenip nuliata Kuupik Kleistillu aappaata inissimmata, Kuupik Kleistilu oqarmat, pissutsinut taamaattunut tamat ilisimatinneqarnerusarnissaat aqqutissaalluartoq.