Ove Karl Aleqa pillugu tupigusuppoq
Naalakkersuisuni siulittaasoq Aleqa Hammond, naalakkersuisuusimasut Kuupik Kleist aamma Ove Karl Berthelsen annikitsumik aatsitassanut ukkusissanik piiaasinnaanermut akuersissut nuliaminnut tunniullugu ingerlateqqimmassuk oqaasissaqaqaaq.
Taamanikkut Siumup siulittaasuata kammalaatersornertut peqquserlunnertullu taamaaliornerat taavaa.
Allaat oqaatigaa ukkusissanik piaanerat suliaq annertuumik taaneqarsinnaasoq. Tassa suliaq milliardit sinnerlugit aningaasartaligaanerarlugu, tamannali ilumuunngilaq aamma Aleqa Hammond taama oqaaseqarsimanini utoqqatsissutiginikuuaa.
Aleqa Hammondip tamatumunnga isumaa maanna allanngorsimavoq.
Demokraatit siulittaasuannut Jens B. Frederiksenimut Aleqa Hammondip akissuteqarnermini allappoq, Miiti Lynge arlaannaanulluunniit qilersorsimanani suliarinnittarnermut malittarisassani ilaammat, uiali pinnani.
Tamammalu naalakkersuisuusimasup Ove Karl Berthelsen tupinnartortaqartippaa.
- Allamik isummiussitsiisaa isummami aalajagiusimasimagaa isumaqarnarpoq, poitikerisut inatsisitigut tunuluaquteqanngitsumik allat nalilersussagaanni manersuunneqartariaqartoq, Ove Karl Berthelsen oqarpoq.
Taassumali naqissuserpaa, Miiti Lyngep uia imaluunniit naalakkersuisut allat aapparisaat piaanissamut akuersissummik peqarnerat ajorinagu.
- Kikkulluunniit piianissamut akuersissumik qinnuteqarsinnaapput, pisinnaagaannilu pisinnaatitaallutik, Ove Karl Berthelsen oqarpoq.
Ove Karl Berthelsenip piffissaq sivisooq atorlugu eqqarsaatigisimavaa, naalakkersuisuni siulittaasup isummaminik allanngortitsinera sumik tunuliaqutaqarnersoq, ilimagaalu qinersinermi suna tamaat sakkugalugu ajugaanissaq qulakkeerniarlugu taamaliortoq.
- Qinersinnermi ajugaanissaq naalakkersuinermilu pissaanermik tigusiniarnermut suna tamaat sakkugalugu iliuuseqartoqarsimanera ersarilluinnarpoq, Ove Karl Berthelsen oqarpoq.
Suliani pineqartuni soorunami assigiinngissutaavoq, Miiti Lynge naalakkersuisunngunngikkallarmalli uia piaanissamut akuersissummik peqareersimammat, kisiannili inatsitigut allaanerussuteqanngitsut Ove Karl Berthelsen isumaqarpoq.
- Teknikkikkut inatsiseqarnikkut taakku pineqartut assigiilluinnarput, Ove Karl Berthelsen taama oqarpoq.
Radioaviisimip Aleqa Hammond tamanna pillugu oqaaseqartinniaraluarpaa oqaaseqarumanngilarli, paragraf 37 naapertorlugu akissuteqarnerminullu innersuussivoq.
