Ove Karl: Aatsitassarsioqatigiiffik akerliusunut naalaartariaqarpoq

Peqatigiiffiup naammagittaalliutigaa, avatangiisinut tunngatillugu nalunaarsuinerni isummersuutitik tusaaneqannginnerat. 

Peqatigiifiimmik pilersitsisoq Piitannguaq Tittussen isumaqarpoq, Nuup kangerluani aatsitassarsiornermut pilersaarusiornermi innuttaasut isumaat tusarniarneqanngitsoq.

London Miningip Isukasiani saviminissamik piiaanissamut qinnuteqaatini qanittukkut tunniutissavaa, suliniut aallartivinneqaraluarpat, tamanna avatangiisinut aamma inuiaqatigiinnut qanoq sunniutaasinnaanera pillugit nalunaarusiat inatsimmi aalajangersagaasut ilaassallutik.  Kisianni Piitanguaq Tittussenip paasinninnera naapertorlugu nalunaarusiani taakkunani innuttaasut isumaat atuarneqarsinnaassanngilaq.
- VVM'it aamma VSB'it, tassa avatangiisinut misissuinerit inuillu atugassaasa kingunerisassaat. Tamakkua innuttaasunut saqqummiunneqanngillat, innuttaasut tamakkunani peqataatinneqartussaapput. Kisianni taamaattoqanngilaq, Nuup Kangerluata Ikinngutaanik pilersitsisoq, Piitannguaq Tittussen oqarpoq.

Aatsitassarsiornermut Naalakkersuisup Ove Karl Berthelsenip, akerliussutsimik takutitsisut qutsavigai. Naak issikkaluaqisoq oqariartuutiginiakkatik apuummatigit, taassumalu peqatigiiffiup allakkamik akerliunermik imalimmik tunniussinissaat qilanaarutigaa.

- Uani London Miningip Alcoallu suliaanut tunngatillugu akerliussutsimik takutitsinersi, oqaatigissavara sulianut ilaassammat aammalu nalilersuinernut oqimaalutaassalluni.

Taassumalu neriorsuutigaa Nuup Kangerluata Ikinngutaasa isornartorsiutaat, London Miningip qinnuteqaatissaani ilanngunneqarumaartut.

- Inoqarfiit qaninnerusut nalunaarusiani akuliunneqarnissaat, isummaminnillu tusarniarneqarnissaat piumasaqaataavoq. Taamaaliortoqarsimanngippallu suliffeqarfiup qularissanngilluinnarpaa, Naalakkersuisunit piumasarineqassaq nalunaarusiaq suliareqqitassanngortinneqassasoq, Aatsitassarsiornermut Naalakkersuisoq, Ove Karl Berthelsen oqarpoq.

Piitannguaq Tittussen aamma oqarpoq London Miningip aatsitassarsiornissamik pilersaarutaa unitsissinnaagunanngikkaluarlugu akiuuttuassallutik.

London Miningip Nuup kangerluata qinnguani aatsitassanik ujaarlernerminik annertusilerinissamut qinnuteqaateqareerpoq, tassungalu atatillugu tusarniaaneq ullumimut killeqarpoq.

Qinnuteqaat akuerineqassappat, London Miningi ilaatigut Isukasiani aallaarsimaarfinnik pingasunik ikaartarfimmillu sanassaaq aammalu aqquserniussalluni.