Oscarinnattup nersornaaserneqarnini nunap inoqqaavisa meerartaannut pigitikkaa
New Zealandimi nunap inoqqaavinit – maorinit - aatsaat siullerpaamik Oscarinnattoqarpoq.
Filmilianut ilitsersuisartoq manuskriptiliortartorlu, Taika Waititi manuskriptimik pioreersumik filmiliorluarnerpaatut sapaammi unnukkut nersornaaserneqarpoq.
Taassuma nersornaat quisaarusiamit Jojo Rabbitimik pissarsiaraa.
Taika Waititi oqalugiarnermini nunarsuarmi tamarmit nunap inoqqaavisa meerartaannut immikkut ittumik inuulluaqqussuteqarpoq.
- Nersornaaserneqarnera una nunarsuarmi tamarmi nunap inoqqaavisa meerartaannut eqqumiitsuliorusuttunut, qitikkusuttunut oqaluttualiorusuttunullu pigitippara.
- Oqaluttualioqqaartuuvugut, tamannalu Oscarinnassutigisinnaavarput, Taika Waititi attortisimasoq oqarpoq.
'Nunanit avannarlernit' Oscarinnattoqartoq
Oscarimik nersornaasiinerni ’Filmiliani Pitsaanerpaaq’ aamma tupaallaatigineqarpoq, tassami Korea Kujallermiup filmiaa ’Parasite’, Oscarip oqaluttuarisaanerani tuluttut oqaasertaqanngitsuni siullerpaalluni nersornaaserneqarpoq.
AAMMA ATUARUK Filmi ´Parasite´ Oscarimik nersornaaserneqartoq
Oscarit inuusaliannguamik nunatsinni pinnannissatsinnut piviusulersaarut, Aquarela nunatsinni filmiliarineqartoq ’Piviusulersaarutini Pitsaanerpaatut’ nersornaasiinissamut innersuunneqarsinnaasuni ilaagaluarpoq.
Innersuunneqanngilarli, taamaakkaluartorli danskit syriamiut filmiliaat ’The Cave’ innersuunneqartunut ilaalluni, piviusulersaarulli ’American Factory’ ippassaq nersornaaserneqarpoq.
Nunani avannarlerneersumik inuusaliannguamik angerlaassisoqarpoq. Tassa Islandimiu, nipilersortartoq erinniortorlu, Hildur Gudnadottir, filmimut ”Joker”-imut nipilersuusiorluarnerpaatut Oscarinnappoq.