Naalakkersuisut orsussamik literimut 25 ørenik akitsuuseeqqinniarnerat nakkaannarneruvoq, inuiaqatigiinnullu akiligassamik ingerlatitseqqinnerulluni. Taamak qisuariaateqarpoq Destination Avannaani pisortaq Per Rosing-Petersen.
Takornariaqarnerinnaanngitsoq inuiaqatigiilli tamarmik eqqorneqassasut Per Rosing Petersen isumaqarpoq.
- Suna tamarmi akitsortussanngussooq tamatta orsussamik atuisuuvugut, inuiaqatigiittullu ingerlariaaseq tulluartuunngitsumik aallassaaq.
Takornariaqarnerup ajorseriarnissaa Per Rosing Petersenip ernumassutigaa.
- Ullumikkut nunatsinnukarneq akisoreeqisoq akitsoqqissaaq, Per Rosing Petersen oqarpoq.
Tamanna aamma Kalaallit Nunaanni Takorniariaqarnermut Inuussutissarsiornermullu Siunnersuisoqatigiinni qularineqanngilaq.
- Takornarissanut imaatigut angalaarniartunut akit qaffassapput, angallassisartunullu angallassinerit aamma akitsussallutik, Anders Stenbakken takorniariaqarnermut inuussutissarsiornermullu siunnersuisoqatigiinni pisortaq oqarpoq.
Takornariaqartitsiviit annikinngitsumik uammilligassaqalerput.
- Kalaallit Nunaannut takornariarnissamut neqeroorutit akisoqaat, akisunerulissallutillu, taamaattumik Kalaallit Nunaannik pilerisaarineq siammarterinerlu annerulertariaqarpoq.
Anders Stenbakkenip paasisinnaanerarpaa nutaanik akitsuusiisoqarnera, aningaasammi arlaanniit nassaarineqartariaqarmata.
- Aningaasanik aallerfiusinnaasunik naalakkersuisut ujaasinerat paasisinnaalluarpara, nunallu allat assigalugit tamanna aamma uagutsinnut atuuttariaqarpoq.