Orsumut akitsuuteqalernissaq ilisimatuut aarleqqutigaat

Danskit nalakkersuisuisa eqqarsaatigaat, "orsumut akitsuusiigunik" inuit ilaatigut peqinnarnerusunik sanigornarnerusunillu nerisalissasut.

Ilisimatuut nunanit tamalaaneersut tatigineqarluartut, Københavnip Universitetiani professorimit Arne Astrupimit siuttuuffigineqartut, misissuinerminnit inernernik American Journal of Clinical Nutritionini saqqummiusseqqammertut, videnskab.dk-mi allaaserineqarpoq.

Ilisimatuut taakkua orsumut aalajangersimasumik sannallit pillugit ilisimasat qulaajarniarlugit misissuinerit nunarsuarmik annerpaat atuaqattaarsimanaat. Inerniliussallu ersaripput:

Tassalu siullermik orsoq aalajangersimasumik sannaqaraagamik, napparsimalissutaasartutut maammanut pasineqaraluartoq, ilumut napparsimalissutaasarnersoq ilisimaneqanngilaq.

Aappassaanik; inuit aatsaat peqqinnerulertarput, orsoq nerisaminniittoq, aalajangersimasumik sannalik, karritanik aserorterneqanngitsunik akulinnik imaluunniit assersuutigalugu orsumik naasuneersunik aalisakkaneersunilluunniit taarserunikku.

Akerlianilli inuit kulhydrateqarnerusunik - soorlu pastanik imaluunniit iffianik qaamasunik - nerisaqarnerulerpata, akerlerluinnaanik pisoqassaaq: tassalu innuttaasut ummamminni taqarsuartigut nappaateqalernissaat qaninnerulissaaq.

- Paasisatsinni immaqa taanna isumakulunnarnerpaavoq. Orsumut akitsuummut atuumatissagaanni tamanna aamma eqqarsarnarluinnarpoq, Københavnip Universitetianeersoq Arne Astrup videnskab.dk-imut taama oqarpoq.

- Orsumut akitsuutip orsortugassat immikkoortinngivippai, taava inuit taarsiullugu suna nerissaneraat nalunavippoq. Aarleqqutigineqarsinnaavoq, inuit maannamut nerisartakkatik, ilisimasallillu nerivallaaqunagit inassutigisaat, ingasallerulersiinnarlugit nerisassagaat, tassalu: Qaqorteqqasut qalipaqanngitsut, naatsiiat, iffiallu qaqortut. Inuit peqqinnanngitsumik nerinerulernissaat taamaalulluni qaninnerulersinnaavoq, aammalu inuit amerlanerusut uummammik taqaasigut nappaateqalernissaat qaninnerulersinnaalluni. Arne Astrup, ilisimatuut allaaserisaanni pingaarnerusutut allaaserinnittuusoq, oqarpoq.