Orfaasumiinneq
Illoqarfinni annaassiniartartut atortorissaarussui tonsinik marlunnik oqimaassusilissuummata arajutsineqarsinnaanngitsuupput. Taakkulu naliginnaasumik illoqarfinni nunamilu ajunaarnersuaqarsimatillugu, soorlu nuna sajoreerangat annaassiniartartuullutik.
Sisamanngormat ualigaa imaatigut annaassiniarnermi sungiusarnerup Sarex-ip ingerlanneqarnerata nalaani Vædderenimi taakku immikkut sungiusartinneqarput, atortorissaarutaallu umiarsuarmi misiligarneqarlutik.
Ajutoorsimasuusaartut marluk umiarsuarmi toqqorneqariarlutik annaassiniartartut kissarnermik malussarissumik assiliissutertik atorlugu ujaasisuatsianngorput.
- Kissarnermik, nipinillu malussarissunik assiliissutivut atorlugit illorsuit isasimasut akornanni inuit kiggigussaaqqasut ujartarpavut, upalungaarsimanermi ataqatigiissarisuni brigadechefiusoq Tine Overby oqarpoq.
Assiliissulli nipinik malussarissoq umiarsuup maskiinaa ingerlatillugu atorneqarsinnaanngimmat assiliissuterput kissarnermik malussarissoq assiliissuteerarlu putuararsiut search cam ujaasinermi atorpavut.
Umiarsuulli maskiinaa unittoorsimappat umiarsuup iluani inuit ujarsinnaavagut. Nipinimmi malussarniutivut pitsaalluinnartuupput, inuillu kiggigussaaqqasut nipiliornimininngui tunaartaralugit ujarsinnaasarlutigit.
Issittumi Upalungaarsimasartussat pilersinneqarnissaat piareersarfigaat
Illoqarfinni Annaassiniartartut USAR-team-it Sarex 2013-ip ingerlanneqarnerani politiit attaveqaateqalersinneqarnissaannut ikiuunnerisa saniatigut umiarsuarni ujaasinermik ilikkagaqarput.
Folketingip upalungaarsimaneq pillugu ukioq manna aappaagulu isumaqatigiissusiaat naapertorlugu issittumi upalungaarsimasartussanik pilersitsitsisoqartussaammat USAR-team-it akulerunneqarsinnaalluarput.
-Sarex-imi sungiusarnerit marluusut tamarmik nalunartut pillugit peqataaffigereerpagut. Tassami issittumi umiarsuarnik angallattoqarneruleriartortillugu upalungaarsimasartussanik pilersitsitsiniarneq akuuffigerusukkatsigu. Sullualukkummi takornariartaassuit umiarsuillu allat angallanneruleriartormata, Tine Overby oqarpoq.
Illoqarfinni annaassiniartartut oqareernitsituut illoqarfinni nunamilu ujaasinermik immikkut piginnaaneqartuupput, Naalagaaffiillu Peqatigiit FN-imit immikkut akuersissuteqartuummata sukkasoorujussuarmik ajunaarnersuaqarfiusunukartinneqarsinnaallutik.
Tassa nalunaaquttap akunnerisa qulit ingerlanerinnaani illoqarfinni annaassiniartartoqatigiit sisamat piareersinneqarsinnaapput, sapaatillu akunnerni marlunni ullut unnuallu annaassiniareeraangata holdinik nutaanik taarserneqarsinnaallutik.
Illoqarfinni annaassiniartartut atortorissaarutaat tonsit marluusut akornanni 600 kiilut tassaapput ujaasinerni annaassiniarnernilu atortorissaarutit. Annaassiniartartut siornatigut Iran-imi ukioq 2004-mi, Tyrkiamilu 1991-imi 1999-milu nuna sajoreersullu annaassiniaqataareersimasuullutik
-Tassa Kalaallit nunaata politiivi attaveqaataasa inississorneqarniarnerini ikiuunnitta, sungiusarnittalu saniatigut annaassiniartartut allat nunat allaneersut Sarex-imullu peqataasut suleqatiginissaat aamma sungiusarlutigu, Tine Overby taama naggasiivoq.
