Oqarasuaatit angallattakkat atorlugit internetterneq TelePostip iluanaarutigilluarpaa
Ukiup affaani siullermi angusat ikinnerulaarnerinut immap naqqatigut kabelip ukiormanna marloriarluni ajutoorutigineqarsimanera pissutaavoq. Suliarineqarnerimi 14,5 mio. koruuninik akeqarsimapput. Taakku iluarsartuunneqartariaqarsimanngikkaluarpata angusat siornamut naleqqiullugit 10 procentinik amerlanerusimassagaluarput.
Aningaasat kaaviaartinneqartut, ilanngaatigisassat ilanngaatigereerlugit, millioninik marlussunnik qaffariarput 410 mio. koruunit missaanniillutik. Angusallu pitsaasut tunngavigalugit, TelePostip 896 mio. koruunit pallillugit nammineq aningaasaateqartup, ukiumoortumik angusassatut naatsorsuutigisani, akileraarutit ilanngaatiginagit 85 mio. koruunit missaannut qaffappai.
TelePostip pisortaanera, Michael Binzer naapertorlugu, pingaartumik oqarasuaatit angallattakkat atorlugit internettimik atuineq angusarissaanermut peqqutaavoq. Oqarasuaatit angallattakkat atorlugit internettimik atuineq ukiup affaani, siullermi siorna piffissap taamaalineranut naleqqiullugu, 151 procentinik qaffariaateqarsimavoq.
Atuinerulertoqarnerata malitsigisaanik, naallu akit malunnaatilimmik appaavigineqaraluartut, kaaviiaartitat 38 %-inik qaffassimapput.
Internettimilli atuinerulernerup kingunerisaanik TelePost internettimik nioqqutigineqartut pitsaassusaannik nukittorsaaniarlu arlalinnik aningaasaliisariaqassaaq.
- Radiot atassuteqaqatigiiaat naammassisaqarsinnaasusaat ukiormanna pingasoriaatinngortissavarput, peqatigitillugulu Nuup illoqarfiani attaveqaatit aamma annertusaaffigineqassapput, Michael Binzer ilaatigut oqarpoq. Taassuma ilanngullugu oqaatigaa flatratemik atuilernerup kingunerisaanik atuineq annertuseriarujussuarnera illoqarfinni siamaterivinnik artukkiisarsimasoq, Michael Binzer oqarpoq. Erseqqissaatigaalugu Nunatsinni sumiiffinni tamani internettimut attaviit akuerineqarsinnaasumik qaffasissuseqarnissaat qulakkeerniarlugu iliuusissanik pilersaarusiortoqalereersoq.
Telepostimut tunngatillugu, suliffeqarfissuup paasissutissiissutigaa allakkeriveqarnermut tunngarsortaa ingerlalluartoq suliffeqarfissuullu angusaanut pitsaasumik tunniussaqartoq. Tamanna ilaatigut poortukkat nassiunneqartartut amerlineqarnissaannik suliniuteqarnerup iluatsinneqarsimaneranik aammalu allakkat ukiuni kingullerni nassiunneqartartut appariartornerisa annikillisinneqarsimanerinik peqquteqarpoq.
