Oqarasuaat angallattagaq atorlugu ikioqqusut

- Unnuaq nalunaaqutaq marlunut tanneq tallimanngortoq kalerrinneqarpugut ittoqqortoormiut avatinnguanni umiatsiat marluk ajornartorsiulersimasut, imarlu aalammat umiatsiap aappaa minneq immalersimavoq, ikiuiartortariaqalerlutalu, Steve Berthelsen Ittoqqortoormiut Politeqarfianni sulisuusoq oqarpoq.

Umiatsiap aappaata orsuerunnerata kingunerisaanik tissukaannalersimavoq, umiatsiarlu immap aalaneranit immamik isaasoqalersimalluni. Taamaasinerani umiatsiap siornganiittoq putup ilaavata sigginnerata kinguneranik immamik isaasoqalerluni.

- Taamaasinerani umiatsiap aappaata kalusiussimavaa, umiatsiarlu oqimaammat aqqutaani orsuerussimallutik, qujanartumik nunaqarfik Ittaajimmiit Ittoqqortoormiut 14-it 15-illu kilometerit missaannik ungasissusilimmut pillutillu taamaasisimapput, Steve Berthelsen oqarpoq.

Oqarasuaat angallattagaq Illoqqortoormiunut attaveqarsinnaagallartillugu, umiatsiamik ingerlatsisut Politeqarfimmut attaveqarsinnaasimapput, taamasillutillu ikiorneqarsinnaasimallutik. Angalasulli VHF radioqarsimasut politeqarfimmi sulisuusoq Steve Berthelsenip oqaatigaa, pisimasumili oqarasuaat angallattagaq atorsimagaat oqaatigalugu. Umiatsiap aappaa nunamut qimakkallartariaqarsimagaat Steve Berthelsenip ilanngullugu oqaatigaa.