- Oqallinnissamut aallaavissaqalerpugut

Naalakkersuisut siulittaasuata Kuupik Kleistip inatsisitigut ataataqanngitsut pillugit nassuiaat iluarisimaarpaa.

-Kalaallit qallunaallu oqaluttuarisaanerat matuinnarneqarsinnaanngitsoq allanneqarpoq. Maanna oqaluttuarisaanermi pisimasut aallaavigalugit oqallinnissamut aallaavissaqalerpugut, Kuupik Kleist nassuiaat pillugu oqaaseqaammi allagaqarpoq.

- Kikkut tamarmik nassuiaammik atuaqqaarnissaannik imarissaalu pillugu oqallississinnaanngorput. Tamatuma kingorna qanoq pisoqarumaarnissaa taamanikkussamut takussavarput, nangippoq.

Kalaallit Nunaanni uersakkat 1914-1974-imi inunngortut inatsisitigut inissisimanerat pillugu oqaluttuarisaanikkut nassuiaat pineqarpoq.

Nassuiaat oqaluttuarisaanermi pisimasunik aallaaveqartumik paasissutissanik katersuinikkut allanneqarpoq. Nassuiaammi meeqqat piffissami pineqartumi katissimanerup avataatigut inunngortut,  inatsitigut inissisimanerat, Kalaallit Nunaata Danmarkillu akornanni attaveqatigiittarnerit qanoq issimanerat misissorneqarpoq.

Taamaattumik pineqartut pillugit nunat taakku arlaata akisussaatinneqarsinnaanerinut pineqartussaanani, Naalakkersuisut siulittaasoqarfianit taamatut nalunaaruteqartoqarpoq.

Nassuiaat siullermeerluni suliarineqarpoq immikkooruteqartuullunilu, taamanikkut pineqartunut tunngatillugu pissutsit qanoq issimanerat paasisaqarfigisallugu periarfissiilluni.

Ilaqutariit meeqqallu pillugit inatsisit taamanikkut imaaliallaannaq allanngortinneqarsinnaasimanngitsut, nassuiaammi paasineqarpoq.

Ilaqutariit meeqqallu pillugit inatsiseqarnerup nutarteriffigineqartariaqarnera pisariaqartinneqartorujussuusoq, Naalakkersuisut Siulittaasuata Kuupik Kleistip oqaatigaa.

Danmarkimi inatsiseqarnermut ministeriaqarfik nassuiaat tunngavigalugu inatsisit sorliit allanngortinneqarsinnaanerinik periarfissat suunerinik maanna misissuivoq. Misissuineq tamanna qaammatip matuma naanerani naammassiniarneqartussaavoq.