Oqallinneq: "Musku" Kangerlussuarmiiginnassava imaluunniit Danmarkimut?
Umimmak piaraq Kangerlussuarmiunit ilaatigut "Muskumik" taagorneqartoq, arfineq pingasut missaannik qaammatinik toqqaassuseqarpoq.
Taanna Facebookkikkut oqallisaangaatsiarpoq.
Taassuma anaanaa umimmanniartunit pisarisoorneqarsimasoq Kangerlussuarmi innutaasut ilimagaat.
"Musku" qaammatini pingasunik Kangerlussuup nunaqarfittaani angalaarusaartarpoq. Uumasut nakorsaanit akiuussuserneqarnikuuvoq, hiistillu nerisassaannik vitamineqarluartunik nerisassaanik tunineqartarluni.
Kangerlussuarmili innuttaasut ilaasa umimmak piaraq Danmarkimiit uumasuusiviit ilaanniit piumaneqarsimasoq tusarsimavaat. Tassunga tunngatillugu aalisarnermut piniarnermullu naalakkersuisoqarfik KNR-imut uppernarsaavoq, nunatsinniit uumasunik annissisinnaanissamut tunngatillugu inatsisinik misissuisoqarmat oqaaseqarsinnaanngikkallarlutik.
KNR-ip Facebookkimi quppernerani innuttaasut assigiinngitsunik oqaasertaliiffigineqarpoq, innuttaasut ilaasa piaraq toqunneqassasoq, ovnikkullu siariarlugu naatsiialerlugu mamaqisoq, allappoq.
Innuttaasut ilaasa takornariat Kangerlussuarmut takornariagassaattut Kangerlussuarmiitinneqaannassasoq kissaatigaat - kiattunukaannagulu nillertumiitinneqassasoq.
" Danmarki kiappallaarpoq, uumasuusivimmut uumasut inaannut mattunneqarnissaa peqqinnanngilaq. Umimmaqataasa akornaniitiinnarli" ataaseq allappoq.
"Naamik, naamik! Nunani kiattumiissiaanngilluinnarpoq, nillertumiissiaruna! Sooruna dk-mut nuutsinneqassasoq!? ilaqutaqarpoq! kisimiinngilaq" alla allappoq.
AAMMA ATUARUK Assit videorlu: Umimmak piaraq anaanaqanngitsoq Kangerlussuarmi angalaarujoorsinnartoq
Tamanna pillugu innuttaasunik isummersortitsilaarpugut.
Umimmak piaraq nunaqarfissinni angalaaqattaarpoq, takuiuk?
- Naamik nammineerlunga takunngilara, kisianni tusaamallugulu assikkut takusarpara, Kangerlussuarmiu, Johan Lange oqarpoq.
Taassuma Kangelussuarmiiginnarnissaa kissaatigaajuk? Imaluunniit Danmarkimut uumasuusiviliaanneqarnissaa kissaatigaajuk?
- Uagut kalaallit ileqqoraarput naalliuppasittunik immaqaluunniit nallinnartutut isikkulinnik takorusuttarata, taamaattullu takugaangatsigit toquinnarneqarnissaat kissaatigisarlugit.
- Kisianni una isumaq uumasuusivissuarmiit piumaneqarpat, taava tamanna piaakannertumik pinissaa uanga kissaatigisinnaavara. Tusaamagakkumi umimmak piaraq sanigorsimaqisoq, taamaassimagumi uumaniarnera oqitsuinnaasimassanngimmat, Johan Lange oqarpoq.
Fritz Baumann Petersenili allatut isumaqarpoq.
-Umimmaqatini maanngaanniit ungasinngitsumiittut naapeqqissagai neriuutigaara. Kilometerimi ataaseq missaaluunniit umimmannik naapitsisinnaavutit, imaasinnaavoq umimmaqatigiiaat ilagisani ilagileqqissinnaassagai, taamaalilluni inissamini pinngortitameeqqilersinnaassammat, Fritz Baumann Petersen oqarpoq.
