Assit videorlu: Umimmak piaraq anaanaqanngitsoq Kangerlussuarmi angalaarujoorsinnartoq
Nunatsinni innuttaasorpassuusugut Kangerlussuup umimmaqarfiunera ilisimavarput.
Umimmaalli piaraanik nunaqarfimmi angalaartumik takuneq qaqutigoortuusoq, ulluni makkunani alutorsaatigineqaqisoq, Kangerlussuarmi innuttaasut ilaat KNR-imut oqaluttuarpoq.
- Una piaraq sivitsortumi nunaqarfitsinni angalaartuartoq maani alutorsaatigeqaarput, inequnaqaaq, Kangerlussuarmi najugalik, Christian Pihlblad Jerimiassen oqarpoq.
Assi: Lisa Hansen Lange
Umimmak piaraq uumasut nakorsaanit orninneqarsimasoq taassuma ilanngullugu oqaluttuaraa.
- Uumasut nakorsaata akiuussuserpaa, umimmak piaraq eqqaavinni aamma nerisassarsiortarmat iluaqutissaanik akiuussuserneqarpoq, taanna oqarpoq.
Kangerlussuarmili innuttaasut ilaasa umimmak piaraq Danmarkimiit uumasuusiviit ilaanniit piumaneqarsimasoq tusarsimavaat.
Vitaminitortinneqartoq
Tassunga tunngatillugu aalisarnermut piniarnermullu naalakkersuisoqarfik KNR-imut uppernarsaavoq, nunatsinniit uumasunik annissisinnanissamut tunngatillugu inatsisinik misissuisoqarmat oqaaseqarsinnaanngikkallarlutik.
Umimmak piaraq anaanaa ukiaq piniarfiup nalaani pisarineqartoorsimnissaa Christian Pihlblad Jerimiassenip ilimagaa.
- Naatsorsuutigivarput ukiariaa piniariarfimmi anaanaasoq pisarineqarsimasoq. Arajutsineqarunarsimavoq anaanaasoq piaraqartoq. Taamaammat aavarianut umimmaanianullu eqqaasitsissutigerusunnarpoq piarallit piniagaaqqusaanngimmata, Qeqqata Kommuniani nunaminertami nakkutilliisoq, oqarpoq.
Christian Pihlblad Jerimiassenip oqarnera naapertorlugu uumasut nakorsaata peqqussutaa malillugu piaraq hestit nerisassaanik vitaminertalinnik nerisinneqartarpoq.
Umimmak nunaqarfimmi angalaarujoortoq. Assi: Tobiasine Abelsen.