Oqalliffik KNR-imi aallarteqqippoq
- KNR-ikkut oqalliffimmik neriunartumik naleqquttumillu sapaatit akunneri tamaasa aallakaatitsisaleqqinnissarput nuannaarutigaarput, KNR-imi nutaarsiassaqartitsinermi pisortaq, Mikkel Bjarnø Lund oqarpoq.
KNR-ip Oqalliffiup taaguutaa attatiinnarniarlugu aalajangerpaa, pissutigalugu radiukkut oqallinnerummat TV-mulli aamma suliarineqartartussaq. Oqallittoqareeraangat kikkut tamarmik peqataatinniarlugit danskisut allagartalersorlugu TV-kkut ulloq taanna unnukkut aallakaatinneqartassaaq. Naalli taaguutaa allanngortinneqanngikkaluartoq nutaartaqassaaq.
Sammisat tamarmik sapaatip akunneranut qulequtarineqartumut tunngasumik videomik facebookikkut aallartinneqartassapput, tamatumunngalu atatillugu sammisap qanoq isumaqarfigineqarnera misigisaqarfigineqarneralu apeqqutigineqartassalluni.
Video ataasinngornerit tamaasa saqqummersinneqartassaaq. Tamatumalu kingorna pingasunngornerit tamaasa nalunaaqutaq 14.07-imit 14.38-mut toqqaannartumik radiokkut oqallittoqartassaaq - KNR-TV-kkullu unnukkut nalunaaqutaq 20.00 aallakaatinneqartassalluni.
- Qulequtarineqartut pisunik tunngaveqartuullutillu pingaaruteqartuusassapput isornartorsiuinertaqartassallutillu - politikkikkut sammineqartut pikkunartut oqinnerusullu sammineqartarumaarput. Aallartinnissarput qilanaaraarput, Mikkel Bjarnø Lund oqarpoq.
Oqallinnermit uissuumminartut, isummat oqaatigineqartullu oqallisigineqaqqissinnaalersillugit Facebookimut sisamanngornikkut ikkuttarumaarpagut.
