Oqaatsivut ulorianartorsiunngillat
Ilitsoqqussaraluguli Oqaatsit Ulluat Nunatsinni malunnartissallugu pingaaruteqarpoq, oqaatsivummi nunarsuatsinni inunnit ikinnerpaanit atorneqarput, 50.000-it missaannit oqaaserineqarlutik.
Nunallu tamalaat akornanni Ilitsoqqussaralugu Oqaatsit Ulluata Oqaasileriffimmit malunnartinneqartarnera ukiut tamaasa aamma ileqquulersimavoq.
Naalagaaffiit Peqatigiit Ilinniartitaanermut, Ilisimatusarnermut Kulturimullu Suleqatigiiffiata, UNESCO-p, Ilitsoqqussaralugu Oqaatsit aqagu ulluanut qulequtsiussimavaa "Ilitsoqqussaralugu oqaatsit atorlugit atuartitsineq, ilinniartitaanermilu taakkuninnga ilagititsineq". Taama qulequtsiinermi erseqqissarniarneqarpoq, ilitsoqqussaralugu oqaatsit ilinniarnissamik pisinnaatitaaffeqarnerup tungaanit isigalugit pingaaruteqarnerat, taamatuttaarlu kaammattuutiginiarlugu nunani tamalaani ilitsoqqussaralugu oqaatsit atorlugit atuartitsinerup ilinniagaqarnerullu siuarsarneqarnissai.
Aqagu ulloq GU-p Nuummi kantiinaani malunnartinneqassaaq, ilinniartut aliikkusersuissapput, isiginnaagassiaminnik takutitsillutik, filmeeraliaminnillu arlalinnik aamma takutitsiumaarlutik. Oqaasileriffimmit erseqqissaatigineqarpoq Ilitsoqqussaralugu Oqaatsit Ulluata siunertarigaa oqaatsit kulturillu iluanni assigiinngiiaassuseq siuarsassallugu, pingaartumik akaareqatigiinneq oqaloqatigiinnerlu aallaavigalugit.
