Oqaatsitta ajortumik atorneqarnerinik uparuaaneq aaqqissuisut ilisarisinnaavaat
Kisianni sulisunik ikililerisariaqalernerat kalaallisut oqaatsit atorneqarnerisa ajorseriarsinnaanerannik ernumalersitsivoq. Atuagagdliutini aaqqissuisoq Inga-Dora Gudmundsdottir Markussen ima oqarpoq.
- Isornartorsiorneqarnerput ilisarisinnaavara. Atuagagdliutini iliuuseqarfigisarparput, soorunalimi, aamma nutserisarnerput pitsanngoriarnikorujussuuvoq. Ilaatigut soorunami kukkunertaqarsinnaasarput, taannalu ajuusaarnaqaaq, oqarpoq.
Tusagassiortut sulisutik pinngitsaalillugit qallunaatut allannissaanik piumaffigineqarsimanngitsut aamma erseqqissaatigaa.
- Namminneq aalajangertarpaat kalaallisut imaluunniit qallunaatut allarusunnerlutik. Periarfissaq ammavoq. Pinnngitsaalineqanngillat qallunaatut allassasut, Inga-Dora Gudmundsdottir Markussen oqarpoq.
Aviisimi Sermitsiami aaqqissuisoq Poul Krarup oqarpoq, namminneq tusagassiortutut atorfilittamik amerlanersaasa qallunaatut allannissartik toqqartaraat, nutserisunut kalaallisunngortittakkaminnik. Taamaammat Arnaq Grovep uparuaanera ilisarnarnerarpaa.
- Nutserisuvut piumaffigisarpavut oqaatsit ataasiakkaarlugit nutsiinnaqinagit kalaallisut eqqarsarlutik allaqqiisassasut. Qallunaatut allaaaserisaq kalaallisut oqaluttuareqqillugulusooq. Siunertarli iluatsittuaannarneq ajorpoq. Kisianni isornartorsiuinerit eqqumaffigisorujussuuagut, Poul Krarup oqarpoq.
Pitsanngoriartornerli killup tungaanut ukiortaamit saatinneqariaannaavoq. Atuagagdliutini aaqqissuisoq Inga-Dora Gudmundsdottir ima oqarpoq.
- Atugagdliutini sulisunik ikililerisariaqarsimavugut, siunissami isertitatigut amigaateqarnerput peqqutigalugu. Taanna ernumanartorujussuuvoq, nassuiaavoq.
Radioavisimi oqaluttuareqqammerparput Sermitsiami sulisut pingasut tallimanngormat soraarsinneqareersut, taakkulu saniatigut aviisiliortutut atorfiit marluk inuttalerneqaqqinngitsuussallutik. Atuagagdliutini sulisut pingasut septembarimi suliunnaarput, sisamanngormallu aamma pingasut suliunnaarlutik.
Taamatuttaaq KNR-imi nutaarsiassaqartitsinermut pisortap, Frederik Lundip, KNR-imi kalaallit oqaasiinik atuineq aaqqiivigisassaqartoq miserratiginngilaa. Taassumali oqaatigaa kalaallit oqaasiinik atuinermi pitsanngorsaasariaqarnermi tusagassiorfiit kisimik isiginiagassaanngitsut.
- Tamakkiisumik isigissagaanni ajornartorsiut tamani atuuppoq, assersuutigalugu pisortat aqutsineranni oqaatsinik atueriaaseq qiviaraanniluunniit kalaallit oqaasiinik atueriaaseqarnissamut isiginnittaaseq uparuagassartaqartorujussuuvoq, Frederik Lund oqarpoq.
- Oqaatsit marluk atorlugit ingerlariaaseqarnermi danskit oqaasii aallaavigalugit ”nutserilaaginnartarneq” akuersaagaavallaarpoq. Kalaallit oqaasii pingaannginerutillugit suleriaaseqarnermi tusagassiorfiit assersuutissaqqiinnarput, Frederik Lund oqarpoq.
KNR-imi nutaarsiassaqartitsinermi pisortaq isumaqarpoq danskit oqaasii atorluarsinnaagaanni nunami maani atugarissaarnerusinnaanissaq qularnaappallaarujussuartoq.
- Pissutsit taamaannerat pissutigerpiarlugu kalaallit oqaasiinik atuineq ajorsiartorusaarpoq.
Nutaarsiassaqartitsinermi pisortap erseqqissarpaa kalaallit oqaasiisa pitsaanerusumik atugarineqarnissaat KNR-imit ataavartumik anguniarneqartuusoq.
