Oqaatsit pillugit saammaateqatigiinnissamut Steen Lynge kaammattuuteqarpoq
Inuiaqatigiit avissaartuutsinneqarnerisa kingunerisaanik partiit ilaasa partiit allat pilliutaasimasutut imminut inissinniarsarisutut pasillerfigaat. Peqatigisaanik illuatungerisamik oqaasiinik paasisinnaannginnertik pissutigalugu malersugaasutut misigisimapput. Tamarmillu oqaatsit pillugit oqallinnermit eqqugaasimasutut imminnut illersuisunngortissimapput.
-Mattunneqarsimasutut misigisimasoqarnera ajuusaarnarpoq, tamarmilli oqallinnermit eqqugaasimasutut inissinniarnerat suli ajuusaarnarneruvoq. Misigissutsit kisiisa aallaaviginaveersaarnissaannut tamarmik akisussaaffeqarput, taarsiullugulu nunatsinni unamminartut suleqatigiissutigineqartariaqaraluarlutik, Steen Lynge Atassummeersoq oqarpoq.
Nunatsinni partiit oqallinnermut tassunga peqataanerat, sammisap politikkimut tunngassuteqanngitsup politikkikkut atorluarniarneqarneranut assersuunneqarsinnaavoq. Tamannalu qinersisartunut, kalaallisut danskisulluunniit oqalukkaluarpata, ajuusaarnarpoq. Taamaammat partiit innuttaasunik kiffartuussinissaq qitiutillugu tamakku peqataaffiginaveersaartariaqarpaat.
-Oqaatsit pillugu oqallinnermi partiit oqallinneq atorlugu qinersisartuminnik immikkoortiteriniarsarinerat ajuusaarnartutut isigaara. Partiit oqallinnermi pissusilersuutigisaat akisussaassuseqaranilu silatusaarnerunngilaq. Tamatumunnga taarsiullugu partiit tamarmiullutik oqaatsitigut aporfiit pillugit paaseqatigiinnissaq sulissutigisariaqaraluarpaat katersuutsitsillutillu, minnerunngitsumillu aamma oqaatsit kuturillu taakku marluk nukittoqutaat samminerullugit, Steen Lynge nassuiaavoq.