Oqaatsinut politikki upernaaru aappassaaneerneqassaaq

NAQQITAQ: Naalakkersuisut oqaatsinut politikkissamut siunnersuutaata, ullumi siullermeerlugu oqaluuserineqartup, Naalakkersuisut siunersuuteqarnerattut aappassaaneerlugu pingajussaaneerlugulu oqaluuserineqarnissaa Inatsisartut aappaagu upernaakkut ataatsimiinnissaannut kinguartinneqarpoq.
Allattoq Jens Thorin
oktobarip 13-at 2009 17:39

Kinguartitsineq partiinit tamanit taperserneqarpoq. Imaanngitsoq siunnersuutip imarisaa isumaqatigineqarmat. Inatsisissamili sukaterinissamik kissaateqarneq pissutaavoq. Inatsisissaq sinaakkusiussatut inatsisaassaaq, kalaallisut oqaaatsit pisortatigoortumik oqaasiulernissaannut nukittorsaataasussaq.

Naak siunnersuut Inatsisartuni arlaleriaqalugu oqaluuserineqartareeraluartoq, inatsisissaq naammanngitsoq, Illuatungiliuttut isumaqarput.

Upernaakkut ataatsimiinnissap tungaanut apeqqutit ajornartorsiutillu assigiinngitsut akissutissarsiorneqassapput.

Tamakkununnga ilaavoq, inuussutissarsiortut suliffii qulinik amerlanerusunik sulisullit oqaatsinut politikkilioqqullugit pisussaaffilerneqassanersut.

Taamaassappat apeqqutaalissaaq, oqaatsinut politikkiliornermi malitsigisaatullu ilinniartitsisoqalerpat, kina akiliisussaassanersoq.

Inuit Ataqatigiit ullumi siunnersuutigaat, inatsisiortoqartinnagu isumasioqatigiittoqassasoq, sulisitsisut sulisullu sinniisaasa aamma pisortat peqataaffigisaannik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq