Oqaatsinik paamaarussisut akiliisitaasinnaapput

Suliffeqarfiit inatsisitigut pisussaaffigaat oqaatsinut politikkeqarnissaq. Suliffeqarfiit siorna aasakkut suli oqaatsinut politikkiliorsimanngitsut kingusinnerpaamik oktoberip aallaqaataani oqaatsinut politikkiliorsimasussaapput taamaanngippat akiliisitsisoqarsinnaalluni.

- Manna tikillugu nakkutilliisunut suli naammagittaalliuuteqartoqarsimanngilaq. Inatsimmik unioqqutitsineq politiinut nalunaarutiginninnermik kinguneqarsinnaavoq, taama oqarpoq kultureqarnermut, ilinniartitaanermut, iisimatusarnermut ilageeqarnermullu naalakkersuisoq Mimi Karlsen.

Naalakkersuisulli pingaartippaat oqaatsinut politikkiliorneq kajumissutsimik pissasoq pinngitsaaliissutaanani.

Siumup siulittaasua Aleqa Hammond paragraf 37 naapertorlugu naalakkersuisunut apeqquteqarpoq tassani ujartorlugu oqaatsinut politikkip timitalerniarnera sumut killinnersoq.

- Naalakkersuisut naliliipput Inatsisartut oqaatsinut politiki pillugu inatsisaat innuttaasunit akuersaarneqartoq. Oqaatsinut politikiliornissamik piumasaqaat suliffeqarfiit iluminni avammullu attaveqarnerminni oqaatsinik atuinerannik erseqqissaanermik nassataqarpoq. Tamatuma taamatuttaaq nassataraa sulisut suliffeqarfinni pineqartuni oqaatsinik pisinnaasaqalernissamut periarfissaqarnerannik erseqqissaasoqarnera, tamatumani suliffeqarfiit arlallit sulisumik oqaatsinik pisinnaasaqalernissaannik kaammattuillutik, taama Mimi Karlsen oqarpoq.

Suliffeqarfiit oqaatsinut politikkiliorsimanngitsut politiinut nalunaarutigineqarsinnaapput tamatuma kingorna akiliisitaasinnallutik.

Akiligassap annertussusaanut aalajangiisuussapput unioqqutitsinerup suunera, annertussusaa akulikissusaalu.